Mexico City a.k.a. D.F.

Letschti Station vo miinere Reis ond gliichzytig d'Krönig esch Mexico City gsi. Wow, was för en Stadt vo de Superlative! 24 Millione Iiwohner send do of ca. ere Flächi vom Kanton Aargau beheimatet. Scho im Dezämber ben ich beidrockt gsi vo de Grössi, wo ich bi Nacht metem Flüger aacho be. Aber erscht wenn mer sech i dem Koloss bewegt, merkt mer wie gross die Stadt wörklech esch. Trotz modernschter U-Bahn bruucht mer emmer mendischtens en Stond zom ergend neume änecho, z'Fuess het mer sowieso kei Chance...


In D.F. beni einisch meh in Gnoss vo de mexikanische Gastfröntlechkeit cho. Ich ha dörfe bi de Violeta, en Mexikanerin wo ich in Oaxaca kenne glernt ha ond wo in D.F. wohnt logiere. Sie wohnt im Süde, ca. 1 Stond vom Zentrum ewäg ime klassische Stadtquartier. So han ich för en Woche huutnöch dörfe erläbe, wie sechs läbt i dere gigantische Stadt. Mis Glöck esch gsi, dass sie grad Ferie het gha ond so obedrii no d'Rolle vo min persönlechi Stadtfüehrer het öbernoh. Esch natürli Perfekt gsi, vorallem wöll ich ghört han, dass sech scho so mänge Gringo verlore het i dem Städtli :-)


Entsprächend hämmer eus au nor Mexican-Style fortbewegt i de Stadt, d.h. met Kollektivos ond Mikrobus, was eigentli nor goht, wenn mer d'Stadt kennt ond weiss wie die verschiednige Strosse ond Plätz heisse. So send d'Kollektivos nämmli aagschriebe, met de Stross bzw. em Start "A" ond em Zyl "B" wo si hin ond här fahre. Zuesätzlech muess mer denne aber gliich de Fahrer no froge, öb er wörkli dete dorefahrt wo aagschriebe esch, da esch nämmli nie so gnau secher ;-)

Die Fahrte send denne au emmer es Abentür gsi, scho elei wäge de Kollektivos sälber. Om d'Fahrgastzahle z'erhöhe lönd sech die meischte Drivers so einiges iifalle bezöglech Design ond Uustatig vo ehrne fahrbare Ondersätz. So wärded ganzi Büs tüüfer gleit, verbeiteret ond riesigi Schürzene rond ome montiert. S'ultimative Partysystem dörf natürli äu ned fehle. Met fette Luutsprächer, Neonlampe, Discochogele, usw... werd s'Inneläbe pimpt. So esch us jeder Fahrt e wortwörklechi Partysafari worde :-)


Uursprönglech esch D.F. e aztekischi Stadt metem Name Tenochtitlan gsi. Zo de Blüetezyt vor de Konquistadore met 300'000 Iiwohner gliich gross wie die grosse europäische Städt zo dere Zyt. De spanischi Cheferoberer "Hernan Cortes" het die herrvorragendi Lag vo dere Stadt au rächt glii bemerkt ond Tenochtitlan als Basis för d'Onderwärfig vo Mettelamerika gwählt. Nach de Eroberig send im Zog vo de Katholisierig leider alli grosse Pyramide abgresse worde ond Chelene ond Regierigsgebäude boue worde demet. Räschtfondamänt wo am Zocalo uusgrabe worde send, lönd die uursprönglechi Grössi erahne...


Näbscht Teotihuacan ond em Museum hets de no so einiges z'gseh geh in D.F. Min Guide het mi dor alli wechtige Stadtteil gfüehrt ond mer alles zeigt. Mexico esch en Mix useme koloniale Zentrum met sehr schöne, grosse Gebäude ond Stadtteil met moderne Glasboute wie si jedi gross Metropole het, s'einzige was chli fehlt send die grüene Fläcke.... Es wiiters Spektakel esch d'Fahneiipakete vo de Nationalflagge ofem Zocalo gsi. Das esch no en rächte Blache, wo jede Obe met Militärparade ond Blosmusig a là "Change of the Guard" im Buckinghampalace verrumet werd. Es bruucht den au ca. 10 Lüt wo Fackel i Schärme schleppe.


Eine vo de Höheponkt esch secher de Torre de Latinoamericano, s'zweuthöchschte Gebäude vor Stadt im Zentrom. Vo dete gseht mer die wohre Uusmass vo de Stadt: Rond ome bes an Horizont nor Hüüser! Dank de aktuelle Wätterlag esch d'Loft sehr klar gsi ond me het bes ad Vulkän före gseh. D.F. esch omgeh vo Bärge ond vorallem im Sommer kämpft die Stadt met enormer Loftverschmotzig, wölls ned rächt cha dorezieh. Mer send a dem Tag de of d'Obedämmerig nomol uf de Torre ufe ond händ de Sonneondergang gnosse ond d'Enstehig vom onglaubleche Liechtermeer id Nacht ine bestuunt.

Am letschte Friitig esch den leider viel z'früeh mis Abentür Mexiko bereits z'Änd gange. Es esch en onvergässlechi Zyt gsi ond ich werde secher ned zom letschte Mol i dem hammer Land met siiner wonderbare Kultur ond sine onglaublech fröndleche Lüt gsi si!

I dem Senn beänd ich min Reisebrecht met:

Hasta luego Mexico, nos vemos!

..