Dienstag, 27. Januar 2009

Mexico City a.k.a. D.F.

Letschti Station vo miinere Reis ond gliichzytig d'Krönig esch Mexico City gsi. Wow, was för en Stadt vo de Superlative! 24 Millione Iiwohner send do of ca. ere Flächi vom Kanton Aargau beheimatet. Scho im Dezämber ben ich beidrockt gsi vo de Grössi, wo ich bi Nacht metem Flüger aacho be. Aber erscht wenn mer sech i dem Koloss bewegt, merkt mer wie gross die Stadt wörklech esch. Trotz modernschter U-Bahn bruucht mer emmer mendischtens en Stond zom ergend neume änecho, z'Fuess het mer sowieso kei Chance...


In D.F. beni einisch meh in Gnoss vo de mexikanische Gastfröntlechkeit cho. Ich ha dörfe bi de Violeta, en Mexikanerin wo ich in Oaxaca kenne glernt ha ond wo in D.F. wohnt logiere. Sie wohnt im Süde, ca. 1 Stond vom Zentrum ewäg ime klassische Stadtquartier. So han ich för en Woche huutnöch dörfe erläbe, wie sechs läbt i dere gigantische Stadt. Mis Glöck esch gsi, dass sie grad Ferie het gha ond so obedrii no d'Rolle vo min persönlechi Stadtfüehrer het öbernoh. Esch natürli Perfekt gsi, vorallem wöll ich ghört han, dass sech scho so mänge Gringo verlore het i dem Städtli :-)


Entsprächend hämmer eus au nor Mexican-Style fortbewegt i de Stadt, d.h. met Kollektivos ond Mikrobus, was eigentli nor goht, wenn mer d'Stadt kennt ond weiss wie die verschiednige Strosse ond Plätz heisse. So send d'Kollektivos nämmli aagschriebe, met de Stross bzw. em Start "A" ond em Zyl "B" wo si hin ond här fahre. Zuesätzlech muess mer denne aber gliich de Fahrer no froge, öb er wörkli dete dorefahrt wo aagschriebe esch, da esch nämmli nie so gnau secher ;-)

Die Fahrte send denne au emmer es Abentür gsi, scho elei wäge de Kollektivos sälber. Om d'Fahrgastzahle z'erhöhe lönd sech die meischte Drivers so einiges iifalle bezöglech Design ond Uustatig vo ehrne fahrbare Ondersätz. So wärded ganzi Büs tüüfer gleit, verbeiteret ond riesigi Schürzene rond ome montiert. S'ultimative Partysystem dörf natürli äu ned fehle. Met fette Luutsprächer, Neonlampe, Discochogele, usw... werd s'Inneläbe pimpt. So esch us jeder Fahrt e wortwörklechi Partysafari worde :-)


Uursprönglech esch D.F. e aztekischi Stadt metem Name Tenochtitlan gsi. Zo de Blüetezyt vor de Konquistadore met 300'000 Iiwohner gliich gross wie die grosse europäische Städt zo dere Zyt. De spanischi Cheferoberer "Hernan Cortes" het die herrvorragendi Lag vo dere Stadt au rächt glii bemerkt ond Tenochtitlan als Basis för d'Onderwärfig vo Mettelamerika gwählt. Nach de Eroberig send im Zog vo de Katholisierig leider alli grosse Pyramide abgresse worde ond Chelene ond Regierigsgebäude boue worde demet. Räschtfondamänt wo am Zocalo uusgrabe worde send, lönd die uursprönglechi Grössi erahne...


Näbscht Teotihuacan ond em Museum hets de no so einiges z'gseh geh in D.F. Min Guide het mi dor alli wechtige Stadtteil gfüehrt ond mer alles zeigt. Mexico esch en Mix useme koloniale Zentrum met sehr schöne, grosse Gebäude ond Stadtteil met moderne Glasboute wie si jedi gross Metropole het, s'einzige was chli fehlt send die grüene Fläcke.... Es wiiters Spektakel esch d'Fahneiipakete vo de Nationalflagge ofem Zocalo gsi. Das esch no en rächte Blache, wo jede Obe met Militärparade ond Blosmusig a là "Change of the Guard" im Buckinghampalace verrumet werd. Es bruucht den au ca. 10 Lüt wo Fackel i Schärme schleppe.


Eine vo de Höheponkt esch secher de Torre de Latinoamericano, s'zweuthöchschte Gebäude vor Stadt im Zentrom. Vo dete gseht mer die wohre Uusmass vo de Stadt: Rond ome bes an Horizont nor Hüüser! Dank de aktuelle Wätterlag esch d'Loft sehr klar gsi ond me het bes ad Vulkän före gseh. D.F. esch omgeh vo Bärge ond vorallem im Sommer kämpft die Stadt met enormer Loftverschmotzig, wölls ned rächt cha dorezieh. Mer send a dem Tag de of d'Obedämmerig nomol uf de Torre ufe ond händ de Sonneondergang gnosse ond d'Enstehig vom onglaubleche Liechtermeer id Nacht ine bestuunt.

Am letschte Friitig esch den leider viel z'früeh mis Abentür Mexiko bereits z'Änd gange. Es esch en onvergässlechi Zyt gsi ond ich werde secher ned zom letschte Mol i dem hammer Land met siiner wonderbare Kultur ond sine onglaublech fröndleche Lüt gsi si!

I dem Senn beänd ich min Reisebrecht met:

Hasta luego Mexico, nos vemos!
..

Sonntag, 25. Januar 2009

Museo de Anthropologia

E betzli Kultur hani mer de doch au no wölle aatue in Mexiko ond so hets chorz vor miiner Abreis en Bsuech i mim erschte Museum geh. Da Museum esch s'grösche vo Mettelamerika ond beherbergt quasi alli wechtige Uusgrabige wo i dem Land gmacht worde send. Entsprächend hani en ganze Tag deför iiplanet.

I riesige Sääl nach de verschiednige Kulture (Azteke, Olmeke, Zapateke, Mayas, usw...) sortiert send die jewiilige historische Vergangeheite uufzeigt worde. Alles sehr iidröcklech, wie zom biispell die riesigi Platte wo mer in Mexiko City uusgrabet het, wo früehner Mönsche drof gopferet worde send.

Ich ha allerdengs ned so viel Fotis gmacht, erschtens schwierig bi dem Liecht wenn de Bletz verbote esch ond zweutens chöme die Sache of Fotis ned so iidröcklech öbere. Nach öppe sächs Stonde hämmers de aber wörkli gseh gha ond send zemmli of de Schnorre gsi. Das alles esch doch es Betzli zviel Kultur för de Banaus gsi ;-)

Teotihuacan - Heimat der Götter

Das esch die grossi Pyramideaalag i de nöchi vo Mexiko Stadt. Teotihuacan esch die gröschti ond bedütendschti Stadt im alte Amerika gsi, met öber 200'000 Iiwohner (Azteke). D'Gebäude send alli entlang vo de calzada de las muertes (Strasse der Toten) wo ca. 40m breit ond öber 2km lang esch. Die Stross esch au höt no eini vo de gröschte urbane Achse vo de Mönschheit.

D'Hauptattraktione send die beide Pyramide del sol (Sonne) ond de la luna (Mond) wobii die grösser d'pyramida del sol ähnlech gross esch wie d'Cheopspyramide in Ägypte (gliichi Grondflächi, aber ca. 40m weniger höch). Die Teils send de au zemmli iidröcklech gsi, wenn mer bedänkt met was för Mettel die boue worde send ond wievel Material do het müesse änegfuget wärde vor ca. 2000 Johr.
Mer weiss aber ned so gnau för was die Pyramide öberhaupt gsi send. Grabchammere send keini gfonde worde. Vermuetli het mer si för ergendwelchi Zeremonie bruucht. Of jede Fall bewiised au die die astronomische Kenntniss vo de Azteke, am 20 Juni bi Sonnehöchschtstand goht die nämmli gnau öber de Pyramide abe.


Natürli semmer de au of beidi Teils ufeklätteret ond händ die onglaublech Uussecht gnosse. Bi 2200müM öbrigens grad no e chliini Heruusforderig ;-) Dobe aacho hämmer de d'Pyramide chorzfreschtig in Torre de Babel onbenannt, hämmer doch öppe 10 verschednigi Sproche ghört dobe, vo de andere Touris...


De Ondergang vo de Stadt esch de einisch meh ned wörkli bekannt, wie bi vielne Azteke- ond Maya-Städt in Mexiko. Mer vermuetet en Brand oder öberfall vo anderne Völker so ca. om 750 nach Chreschti Geburt. E super Tag gsi met super Wätter, s'Bierli zobig het nach so viel Sport om so besser gschmöckt ;-)

Freitag, 23. Januar 2009

Cuarnevaca


Es esch mol weder es zytli zemmli ruhig gsi die letschte Taeg om mech. Het mer halt mol leider ned glaengt zom laenger is Internet z'goh ;-) Nach Puebla han ich vier Taeg in Cuernavaca verbrocht. Cuerna esch e totali Studaentestadt ond zodem Uusflogsziil #1 vo de D.F-ler.


Vo Cuerna seit mer, dass si s'schoenschte Waetter vo ganz Mexiko haend. Of grond vo de Hoehelag (ca. 1600m) ond de zentrale lag herrscht in Cuerna s'ganze Johr aagnehms, fruehligshafts (ca 25 Grad warms) Waetter. Nor komisch, das ich in Cuerna s'erschte mol Raege erlaebt han of minere ganze Mexikotour ;-) Naja..., esch jo nor en Tag gsi ond ned so rechtig heftig...


Cuerna esch aber an ond foersech ned wiiters sehenswaert. Ich be au do aene, woell e Kollegin vo mer us de Schwiiz, wo es Uustuschsemeschter in Cuerna gmacht, au grad dete z'bsuech esch gsi. Ich ha denne ebefalls bi erne 3 mexikanische Kollege irer WG doerfe wohne i dere Zyt. Voll cooli Luet ond danke nomol foers vermettle, Desiree :-)


Mer haend denne ein Tag en uusflog of Tepotzlan gmacht, es Doerfli i de noechi i de Baerge. Dete hets neumed hoech obe no en chliini Pyramide. Mer haend de aber kei Loscht gha zom zwe Stond dete ufechroegle ond haend eus i de Gelateria met oeber 100 Sorte Glace d'Buech voll gschlage.


D'Kollegin het denne au jede Menge Luet muesse bsueche i erem chorze Uufenthalt ond ich ha mol weder wonderbarschts Spanischtraening becho. Entspraechend esch dene min Cuernavaca-Uufenthalt vorwiegend us Studaentepartys ond Anwendung der erlernten Sprache im Aernschtfall bestande. Am Samschtig morge eschs de wiiters gange rechtig D.F. mis letschte Zyl. Dodevo werdi aber de vermuetli erscht us de Schwiiz brechte, d'Foeteli send aber scho dobe.


Dienstag, 13. Januar 2009

Puebla

Am Mentig morge nocheme coole Wocheaendi met de Oaxaqueñias eschs definitiv Zyt gsi zom Tschuess saege vo dem hammer Staedtli. Metem Bus esches wiiters rechtig Puebla gange. Puebla esch e groesseri Stadt met ca 3,5 Mio Iiwohner meteme grosse Zentrum im Kolonialstil ond vielne Chelene. Vorallem bekannt esches aber au als Industriezentrum, so send au die grosse VW-Waerch vo Mexiko in Puebla. Do esch vor ca. 10 Johr no de letschti Original VW-Chaefer vom Band gloffe :-)

Puebla esch zwar met 1400m.ue.M ned so hoech, aber do im Momaent e Chaltfront oeber Mexico zieht esches grad zemmli froeschs Waetter foer hiisigi Verhaeltniss. Da heissst, nor so knapp 20Grad. Aber das muess ich euch jo ned vorjommere, hehe. I de Stadt saelber gets ned speziell viel zom aaluege, drom bliib ich au nor guet 1.5 Taeg. Ergendeinisch gseht halt jedes Huus ond jedi Chele gliich uus, au wenn si ime no so schoene Kolionalstil boue esch...

Per Zuefall han ich de aber i mim Reisefuehrer no entdeckt, dass in Puebla s'groeschte Iisebahn-Mueseom vo Mexico beheimatet esch. Da hani de natuerli als mini Pflecht erachtet, das go z'bsueche. Hoet fahred jo in Mexico mol abgseh vo einere Touri-Linie ond de Metro in D.F. (emmerhen die 3.groescht vo de Waelt) keini Personezoeg meh. Of der Suechi nochere Antwort vo dere Misere han ich mech frohen Mutes dete aenegmacht.

Dete aacho send de mini Erwartige aber scho bald mol zemmli daempft worde. S'Museum het leider ned so viel haergmacht wieni ghofft han. Es send eifacht es paar alti Dampf- ond Diesellocks, vorwiegend us de USA oebernoh imene Park gsi. Es het de doch no s'eint oder andere einigermasse restaurierte Stoeck debii gha, z.T. i scho no raecht imposannte Groessene. Leider esch denne au oeber d'Gschecht vo de Mexikanische Isebahn nuet z'fende gsi ond es het mer au niemmert woerkli choenne Uuskonft geh. Es saeig halt eifacht baergab gange nach de Privatisierig... Defoer hani dete de no oeber e Stond met zwe wetzige Securitas (natuerli met Pump Action, wie sech das ghoert in Mexico) oeber Gott ond die Welt plauderet. Die haend mer denne au no grad es paar gueti Tipps foer de Uusgang choenne geh. Die gohni jetzt de grad go abchegge ;-)

Sonntag, 11. Januar 2009

Villahermosa

No am gliche Obe nachem Agua Azul beni de weder elei wiiters is guet 2h entfaernte Villahermosa. Die Stadt het i de 70er en riese Boom erlaebt wo Erdoel gfonde worde esch. Entspraechend esch de im Oebermuet au so rechtig klotzet worde met topmoderne Bankgebauede ond riisige Parks. Villahermosa esch ofenes Sompfgebiet ufeboue, dorom hets au oeberall chliini Seeli ond Toempel. Eigentli es schoens Staedtli, aber ebe keis typisch Toureschteziil. Ich be de au e zemmlechi Attraktion gsi als Wiishuut, ich ha mech no saelte so beobachtet gfuehlt :-)

Villahermosa esch au gliichzytig d'Heimat vo de Olmeke. Sie send die erschti indianischi Hochkultur in Mexiko gsi. Ene esch de au liecht osserhalb vo Villahermosa en Park gwidmet worde. D'Olmeke haend riesigi Steichoepf baschtlet wo bes zo 60t schwer gsi send. Natuerli haends foer das ned Cheslige vo vor Ort gnoh, sonder Vulkangestein vo oeber 100km ewaeg. Entspraechend het au mol weder niemert en Ahnig, wie sie die Denger oeber die Distanz dor de Urwald brocht haend. Leiider weiss mer generell ned sehr viel oeber d'Olmeke, woell si kei Schrift gha haend. Si haend aber ebefalls scho gschuettelet ond en Ahnig vo Astronomie gha.

Do ich jetzt met mirer ganze Chiapas-Tour zwe Tag ehner fertig gsi be als planet, hani mi entschiede nomol en chliine Abstaecher of Oaxaca z'mache zom erhole ond nomol eis go zieh met mine Kollege vo do. Do beni jetzt au grad ond has doch gschafft, die letschte 10 Taeg mol aendli in Blog ine z'hacke. Morn gohts de wiiters rechtig Puebla, Cuernavaca ond D.F. bevors de leider scho viel z'bald weder zroegg i die chalt Schwiiz goht :-(

Palenque

Palenque esch ebefalls e Tourihochborg, woell dete met de Ruine vo Palenque ond Agua Azul zwe vo de Hauptattraktione vo Mexiko send. Ich be dete grad met zwe Argentinier onderwaex gsi wo ich in San Cristobal kenne glehrt han ond mer haend eus foers Jungleprogramm entschiede. Palenque esch weder of guet 400m obe ond mette im Urwald. En wiitere Temperaturschock zroegg of fascht 30 Grad ond 100% Lofttfuechtigkeit. Eusi Cabanas send de liecht osserhalb vo de Stadt Palenque voll im Urwald gsi. Die ganz Aalag esch sehr gmuetlech iigrechtet gsi, sogar meteme natuerleche Pool vomene Urwaldbaechli. Ich be de zerscht au ned ganz secher gsi, oeb ich dete workli ine soell (foer alli wo de Film "Welcome to the Jungle" kenned, die woessed werom ;-) ) aber in anbetracht vom toeppige Klima hanis de gliich riskiert.

Nochem erfroeschende Schwomm esch de die erscht Attraktion ofem Programm gstande. D'Ruine vo Palenque. Die send de woerkli au sehr iidroeklech gsi. Im Gaegesatz zo Monte Alban in Oaxaca send si no imene super Zuestand gsi ond ebe wonderschoen im Urwald iibettet - e hammer Kulisse! D'Aalag erstreckt sech oeber ca. 1 km2 aber es waerded staendig neui Gebauede entdeckt ond me goht devo uus, dass mer erscht en chliine Teil freigleit het vo allem.

Nach de Nacht im Urwald bi onglaublecher Grueschkulisse ond Weckkonzaert am Morge dor d'Bruellaffe esch de die zweuti Attraktion ofem Programm gstande - Agua Azul. Agua Azul esch en Floss wo sech ober honderti vo chliinere ond groessere Wasserfaell dor de Urwald schlaenglet. Eigentli send jo foer en Schwiizer Wasserfaell ned onbedengt en riise Attraktion, aber Agua Azul het sine Verspraechige woerkli stand ghalte. Dor das sehr chalchaltige Wasser esches total blau iigfaerbt gsi ond oeberall haend sech chliini natuerlechi Yakousis bildet wo zom abchuele iiglade haend. Esch aso sozsaege es natural Alpamare mette im Urwald, mer send de dete au omeghanget bes chorz or de Uufloesig vo euserer Huut :-)

San Cristobal de las Casas

Nach de Canyontour beni metem Collectivo weder zor Autobahn ufe, wo rechtig San Cristobal goht metem Plan, dete de Bus abzfoh. In Mexiko esch da zemmli onkritisch, do cha mer emmer oeberal ii- ond uusstiige, sogar ebe of de Autobahn. Nach so ere Viertelstond warte esch aber no wiit ond breit kei Bus cho gsi ond defoer het es Taxi aaghalte ond mech gfrogt oeb ich of Cristobal ufe woell. Ich ha das bejoht aber met de Bemerkig dass ich mer keis Taxi well leischte foer die guet Stoendigi Busfahrt. De Taxifahrer wohnt aber in Cristobal ond esch grad ofem Heiwaeg gsi ond het gmeint, er naem mech zom Buspriis met. Das Agebot hani natuerli ned choenne ablehne ond so beni iigstege.

Waehrend de Canyon of ca. 300 m.ue.M esch, esch San Cristobal of 2200m obe. De Taxifahrer esch vermuetli en entfaernte Verwandte vomene Formel1-Fahrer, er esch die Strecki im Schnett met oeber 100 Sache ufegheizt. I de Ohre esches ononderbroche am knackse gsi ond nach guet ere halb Stond semmer de au scho dobe gsi. Ned schlaecht foer 1900 Hoehemeter :-)

Entrspraechend esches in San Cristobal au zemmli froesch gsi met ca. 15 Grad. Zemmli e Temperaturschock nach oeber 30 Grad am Meer. Cristobal esch es chliises Kolonialstaedtli met Hueser i allne Farbe schoen aagmolet ond alles esch sehr suuber. Es het honderti vo chliine Chelene oeberall verteilt of de Hoegel obe. Do esch mer scho zemmli noech a Guatamala ond es get i dere Gaegend no sehr viel indigeni Doerfer. Die verchaufet denne au ehri vo Hand gmachte Produkt wie Tuecher, Chleider, Malereie, usw... Es het mi de aber scho chli komisch donkt, dass mer ergendie a all dene Marktstaend exakt die gliiche Sache bechonnt. Wo ich de en Mexikaner zobig i de Bar of das aaghaue han, het er gseit, das Zuegs chiem eh alles usem "Belligarbetsland" Guatamala ond seig nor en Trappa Touristica.

Es het in San Cristobal de au tuusigi vo Toureschte gha ond entspraechend send au d'Priise gsi. Foer mech esch das alles chli too much gsi, esch mer ned so woerkli rechtig mexikanisch vorchoh, ehner wie es grosses Disney Land. Dorom hani mi denne nach zwe Tag weder verabschiedet ond be fruehner wie planet wiiters in Rechtig Palenque.

Canon de Sumidero

Nachere wiitere Nacht im Bus ben ich am Morge frueh in Tuxla aacho. Dete send mini Spanischkenntniss es erschts mol so rechtig pruefft worde woell mech de Reisefuehrer mol so voll im Stech glo het. Het scho demet aagfange, dasses es neus Busterminal geh het vor ca. eme halbe johr, wo neu ebe zemmli osserhalb vom Zentrum esch. De hani zerscht mol muesse usefende, wo dass d'Collectivos is Zentrom fahred. Tuxla saelber esch d'Hauptstadt vom Staat Chiapas ond es Industriezentrom wo nuet z'biete het. Esch denne foer mech au nor Omstigestadt foer zom Canyon de Sumidero wo ca. 10km osserhalb esch gsi. Natuerli send d'Minibus det use au noemme dete gfahre, wo i mim Fuehrer gstande esch. Dasmol beni aber uusnahmswiis a Mexikaner grote wo sech uuskennt haend ond mer en korrekti Waegbeschriibig zom Abfahrtsort haend choenne geh. So het de doch alles relativ riibigslos klappet.

D'Fahrt de Canyon hendere esch denne au voll cool gsi. De Canyon esch ca. 12km lang ond a de hoechschte Stelle oeber 1000m tuef. Met Higspeedboetli semmer de Floss henderegfahre ond do ich wederom zemmli frueh am morge dra gsi be, hets nonig viel Verchehr gha ond e huufe Tier send no onderwaex gsi. Waehrend d'Hefahrt sehr gmuetlech met etleche Stopps waege de Canyonbewohner oder interessante Felsformatione gsi esch, esches denne ofem Roeckwaeg met Vollgas zroegg gange, die Boetli send de au zemmli abgange ond nach ca. 2.5 Stond semmer zroegg gsi.

Donnerstag, 8. Januar 2009

Mazunte

Mis noechschte Ziil Mazunte esch es chliises, vertraeumts Feriedoerfli am Strand. Im Gaegesatz zo Puerto Escondido esch do eigentli gar nuet los. Es het ein Hauptstrand met es paar Beizli wo mer diraekt am Meer im Sand bi Cherzeschii cha feine froesche Fesch aesse oder Piña Coladas schluerfe.

Ich ha no zemmli Mueh gha en Onderkonft z'fende, esch doch emmer no Hochsaison gsi. Ha de aber schlossaendli no es schoens Cabaña (en Art Bungalow) met Meersecht verwoetscht. Hoffe, dass denne noch dem Wocheaendi weder chli weniger los esch, wenn d'Mexe weder muend schaefferle...

Mazunte (indianisch = "bitte legen Sie Eier") esch bekannt foer sini Scheldchroett wo jedes Johr zo Tausende goend go Eier ablegge am Strand. Am Dorfrand het mer us dem Grond es Tortuga-Centre groendet, wo me die Tier cha in Aquare aaluege. D'Metarbeiter vo dem Zentrom koemmered sech au om d'Uusbruetig vo de Eier. D.h. sie goend si nochem legge go uusgrabe ond brenged sie in Secherheit vor de Raeuber. D'Aquarie im Zentrom saelber send ned sehr spektakulaer, glaube i eusne Zoos i de Schwiiz gseht mer grad so viel vo dene Panzertier.

Aber s'Zentrom het foer d'Erhaltig vo dene Tier en onschaetzbare Waert. Vor de Groendig haend sech d'Iiwohner vo Mazunte naemlech vorwiegend vom Verchauf vo de Tier ond vorallem de Eier wo als Potaenzsteigernd gaelte ernaehrt. Dor das Zaentrom esch Mazunte zomene Ferie- ond Uusflogsort vorallem foer Stadtmexikaner worde ond die Iiheimische choened jetzt guet vom Tourismus laebe. Do hani doch grad no en Piña Colada bstellt, natuerli nor zom Schotz vo de Tortugas ;-)


Am noechschte Tag beni denne im Nochberdoerfli La Ventanilla (=Fensterchen) en Lagunetour go mache inere Suesswasserlagune. Send gmuetlech met Boetli das ca. 2km lange Lagueneli hendere paddlet ond do ich frueh dra gsi be, hets no e huufe z'gseh geh. Cocodrillos, Tortugas, Voegel, die ganzi Flora, usw... Am Nomitag esch de no einisch Strandlegge aagseit gsi, bevors de zobe metem Nachtbus in rechtig Tuxla los esch, zom Canion de Sumisero.

Samstag, 3. Januar 2009

Puerto Escondido

Puerto Escondido esch es gmuetlechs Feriedoerfli am Pazifik. Nach ere guet 10-Stoendige Busfahrt dor d'Nacht beni am morge frueh do aacho. Woni usem Bus usgstege be, hets mi de au grad fasch omghaue. 1800 Hoehemeter weniger, 12 Grad meh ond fascht 100% Loftfuechtigkeit. Im verlauf vom Tag het mer sech denne aber dra gwoehnt gha.

Escondido esch es Feriedoerfli wo viel Mexikaner us D.F. goend ond en bekannte Spot i de Surferszene. Aendi Novaember trefft sech do s'who is who vo de Surfer, wenn d'Waelle gaege die 6m hoech send. Ganz so schlemm eschs jetzt aber noemme gsi, bi de High-Tide send aber doch emmer no beachtlechi Kracher vo 3-4m as Meer grollt. Aso nuet foer Beckerandschwemmer ;-)

Viel z'brechte gets vo do eigentli ned. D'Graenicheros wo sech im Momaent in Mexiko uufhaltet haend sech do zaemgfonde zom Badeferie mache ond Selveschter fiire. So haemmers de au gmacht, of de fuule Huut glaege, feine Fesch gaesse ond deck gfieret wo der scho lang im Bett gsi send :-p Natuerli hets denne am 1.1.09 en schoene Sonneuufgang am Strand geh vorem go legge.

Nach drue Taeg het sech denne das Troeppli weder uufgloest ond jede esch weder siine eigne Reiseplaen nochegange....

Hasta luego Oaxaca :'-(

Ich henke im Momaent leider emmer nochli hendedrii met de Brechterstattig, beni doch scho sit es paar Tag noemme in Oaxaca. Da liit einersiits dodra, dass es ned emmer eifach esch, es bruuchbars Internetkafi z'fende ond anderersiit send jetzt grad mini Ferie i de Ferie am Strand ond ich gohs raecht gmuetlech aa do. Trozdem no es paar Wort oeber mini letschte Taeg in Oaxaca.

Nachdem am Zischtig (aso am 23.12) die ganzi Wiehnachtsfiirerei i de Stadt met de grosse "Noche des Rabanos", was in etwa e Raebeliechtliomzog esch, eifach met einiges kompliziertere Kreatione, beaendet worde esch, send am 24. die grosse Fiestas i de Familie losgange. Am 25. hets Schuelfrei geh, wo ich denne am Nomitag noch gmuetlechem Uusschlofe mol of de Huusbaerg met de Antenne ufegwanderet be. Vo dete obe het mer e sensationelli Uusecht oeber s'ganze Tal ond me gseht mol iidroecklech die ganzi Dimension vo Oaxaca met siine rond 1'000'000 Iwohner met allne Vorort.

Trotzdem esch foer mech Oaxaca ergendwie wie es chliises gmuetlechs Doerfli. Ich ha das Staedtli ond sini Luet woerkli is Haerz gschlosse. Am Friitig esch de letschti Schueltag aagstande ond somet bereits die erschte Verabschedige vo allne Lehrer ond Metarbeiter vo de Schuel. Ich werde si in gueter Erennerig bhalte ond dankene foer d'Naerve wos bruucht haend, zom mer Spanisch biizbrenge, vor allem wenns mol oeppe en Morge geh het, woni nonig so 100% fit gsi be :-)

Am Wocheaendi esch de naeb de TouriTour #2 vorbereite of de Reiseteil vo mine Ferie aagseit gsi. Nomol bi mirer Coiffeuse de Bart go frisiere, id Lavanderia d'Chleider zom Waesche geh, usw... Nach dene zwei Woche in Oaxaca han ich mech scho fascht gfuehlt als wenn ich scho ewig do waer. D'Luet i de Laede haend eim bereits met Name aagsproche, of de Stross het mer allbot oepper troffe, wo me ergendwo kenne glehrt het. D'Mexikaner send voll gmuetlech droffe, die naemed sech emmer 5min Zyt foer en chliine Small Talk. Ich be sogar a mim letschte Tag no vome Polizescht met Vorname aagsproche worde, de hani daenkt jetzt esch definitiv noemme guet, wenn d'Roennleitig mis Foeteli i de Fahndigsakte het. S'het sech denne aber usegstellt, dass es min Salsalehrer esch gsi, wo halt eifach au no als Polizescht schaffet.

Das esch ergendwie sowieso normal do - jede Mexikaner het 2-3 Joebs do. D'Mexe send eigentli es sehr flissigs Voelkli, nor organisatorisch send si ned emmer so optimal iigrechtet. Si haend es anders Zytgfuehl als mer, was ich eigentli nochdem ich mech mol dra gwoehnt ha (was ned lang gange esch, be scho am zweute Schueltag die obligate 15min z'spot cho ;-)) als sehr aagnehm empfende. Vorallem bewonderi die Luet, dass se sech ebe no Zyt naemed foers Laebe ond ned nor eifach i de Gaegend omehetze wie mer Schwiizer das oft mached. Ich hoffe, ich cha chli oeppis vo dem methei neh...

Aber jetzt esches sowit zom "hasta luego" saege. Ich ha mech bi de Familie verabschiedet met ganz viel Schoggi ond eme Schwiizer Sackmaesser ond jetzt gohts los of Puerto Escondido id Waermi ond an Strand. Sobald ich mol e bessers Internetkafi fende, tue ich de mol die neuschte Foeteli ufelade ond chli was vo de Playa brechte...

Freitag, 2. Januar 2009

Familia y Escuela

Mini Familie esch wie ich jo scho gschriebe han, mega froendlech ond helfsbereit. Die ganz gnaui Aazahl vo allne Luet wo do wohned hani aber nonig usegfonde. Dor das grad Wiehnachtszyt esch, send im Momaent alli of Oaxaca zroegg cho ond goend ii ond uus. Die ganzi Wohnaalag bestoht us 3 foer mexikanischi Verhaeltniss "bonzige" Hueser (1. Gasteltere, 2. Schwoeschter vor Gaschtmuetter, 3. de Tante) wo bes zo 12 Studaente choene zuesaetzlech wohne. Mini Gaschteltere (Inelva ond Gilberto) send beidi paensionierti Lehrer ond koemmered sech om s'leibleche Wohl vo de Studaente. Am Aafang semmer ebe nome drue Schwyzer gsi, jetzt send aber no en Japanerin ond zweu Amis dezuecho ond wo ich de gange be, send grad nomol oeppe 6 Amis meh cho. Aso hoechschti Zyt zom abhaue gsi, ha jo Mexiko buechet ond ned USA :-)

Am 24. hets au e rechtig decki Wiehnachtssause geh. Met allne Familiemetglieder ond eus 3 Schwiizer. Z'erscht haend d'Chend doerfe e Piñata verhaue ond so gaege die 11i zobe esch de deck gaesse worde. Am 12i het's denne ploetzli ¡feliz navidad! gheisse ond all haend enand omarmt ond e schoeni Wiehnacht gwoenscht, aehnlech wie mer am neue Johr. Esch e cools Erlaebnis gsi, mol inere andere Kultur doerfe Wiehnachte fiire.

D'Schuel esch ebefalls cool. All Woche waechslet de Lehrer ond die legged es aaspraechends Tempo vor. Do ich waege gueter fuehrig grad i de zweute Woche ha choenne istiige, hani grad chli muesse bisse ond einiges au i de Freizyt no nocheschaffe. Aber mettlerwile klappets scho ganz guet met spanisch z'rede, obwohl die zwei Woche be wiitem niene aene waerde laenge. Aber vielecht fendi jo de i de Schwiiz e Moeglechkeit zom mini Kenntniss wiiters z'vertuefe...

I de Pause cha mer sech i de chliine Schueleigne Kantine vo de Romia lo verwoehne oder om de Egge am Frochstand en Snack hole. Am Nomitag esch de amix Konversation aagseit om die glernti Theorie z'vertueffe. Am 3 noch de Schuel gets de z'Mettag deheime ond aaschluessend esch Siesta ond Lehre aagseit, bevors de ofes Bierli goht, zom s'glernte im Aernschtfall z'erpobe :-)

So in etwa esch de Tagesablauf in Oaxaca, leider aber esch mini Zyt do scho bald verbii...