Guatape

Guatape esch es chliises Kolonialdoerfli i de Highlands vo Medellin. S'eigentleche High Light esch aber de Stausee, wo dete vor ca. 30 Johr baue worde esch, om Medellin met Strom z'versorge. Nach ca. zweistoendiger Busfahrt semmer bim Uusechtsponkt "La Piedra", was soviel wie "der Stein" beduetet, aacho. De Stei esch en Monolit wo ca. 200m hoech esch wo mer dor en Staege met 660 Stufe (inkl. Torm) cha erklimme. Ond tatsaechlech, d'Ussecht vo det obe esch oeberwaeltigned gsi. De Stausee het sech i alli Taeler hendere gfoellt ond us de Hoegelspetze send so Enseli worde. Gseht hammer us, wie en Modelllandschaft. Do obe haend vieli guet betuechti Medelliner ehri Feriefinkas, bzw. Privatenseli. Nochaene esches de no nach Guatape gange, es naetts chliises Doerfli met schoen aagmolete Huesli, aber nuet wiiter speziells. Dete hets en feini Foraelle zom z'Mettag geh ond nochaene esches de au scho weder rechtig Medellin "heigange".

Bienvenido en Medellin

Am Mettwoch Obig semmer de in Floghafenoechi bi es paar Froende vo de Violetta ond em Roman, wo ich zom Teil au no vo mim letschte Mexiko Trip kennt ha, zom Aesse iiglade gsi. Mer haend wonderbarschti mexikanischi Chochi met chilenischem Wii doerfe gnuesse ond do ich am Donnschtig morge bereits am 6i weder ha muesse am Floghafe sii, hets die Nacht ned woerkli viel Schlof geh. So eschs de abgange Rechtig Medellin via Bogota, de Hauptstadt vo Kolumbie.

De Flog nach Bogota esch de absoluti Hammer gsi. Z'erscht semmer om de no aktivi Vulkan Popokatapetl in Mexico City gfloge, wo usem Wolkemeer usegragt het. Nachaene esches de ganze Pazifikkueschte entlang gange. Honduras, San Salvador, Nicaragua, Costa Rica, Panama. Emmer wieder het mer rauchendi Vulkaen gseh ond bi Panama het mer sogar oeber s'ganze Festland inegseh bes as karibische Meer oebere. Paar Foeteli usem Flogifeischter folge de no.

In Bogota esch de aber chli Stau gsi ond mer haend no es paar Schlaufene muesse fluege. Was ned onbedengt optimal esch gsi, hani doch in Bogota nor knapp 50min Zyt gha zom omstige. De Fleuger het de oeppe do am Gate aadockt, wo mi Aaschlossflog gstartet waer. D'Naerve hani de aber einisch meh fascht verlore, beni doch vo Luet am Floghafe dete gmuetlech dor de ganzi Floghafe geleitet worde. Ha sogar no mis Gepaeck saelber muesse dor de Floghafe traege, obwohls eigentli dorechecket esch gsi. Naja..., andere Laender, andere Sitten...

So beni hoett of jede Fall guet in Medellin / Kolumbie aacho. De erschti Iidrock vo dem Land esch bes jetzt raecht positiv. D'Luet send sehr froendlech ond helfsbereit ond au d'Stadt saelber mach e raecht ordentleche ond doreorganisierte Iidrock. Via Floghafeshuttel ond Stadtmetro beni de be mim gmuetleche vo zwei Neuseelaender gfuehrte Hostal aacho. Morn gohts de ab, die Stadt mol chli gnauer z'erkonde.

Back to Mexico City

Am Montag morge frueh esches also los gange. 1. Ziel Mexico City via London City. Ond de Start vo de Reis hets bereits in sech gha. Het mech doch die naetti Dame vom Check In froendlecherwiis druufhegwiese, oeb mer bewosst seig, dass de Flueger wo ich noch London fluege ned woerkli am gliiche Floghafe aachont, wie de wo de Flueger noch Mexico startet. Das esch de grad mol de Schock vom Tag gsi. Bim Internetbueche sett mer halt amix au s'chliidrockte laese ;-) Hett foer mech of jede Fall beduetet, dass ich i dene 3 Stond Uufenthalt vom City Airport wo 10km oeschtlech vo London esch nach Heatrow ha muesse waechsle, wo 20km westlech esch. D.h. einisch quer dor die ganz Stadt. Das ganze het den aber ganz guet klappet, trotz dem, dass ich vier verschedeni Zoeg bzw. U-Bahne bruucht han, ben ich i rekordverdaechtige 1.5h dor d'Stadt dore gsi ond in Heatrow weder am Check In gstande (woell Gepaeck dorechecke dor zwei verschedni Floghaefe natuerli au ned woerkli fonktionniert). Ha de aber au nochli Gloeck im Ongloeck gha, wo ich am City Airpoirt of de 1. Zog ha woelle, esch mer grad eine entgaegecho wo mer en Tagespass foer d'London-Transportsystem id Fenger droeckt het, er bruchi de noemme, er gieng jetzt hei. So hani nedemol d'Pfond bruucht, wo ich aextra am Floghafe z'Zoeri no gwaechslet gha ha. D'Naerve ebe gliich scho weder z'frueh verlore ;-)

De Wiiterflog nach Mexico City esch denne aber ohni wiiteri Problem abgange. Dete beni denne au vom Roman in Empfang gnoh worde ond so beni nach guet 18h onderwaex aendli aacho. Mer send de no gschwend bim Fuetterstand bim Roman om de Egge go z'Nacht aesse, so hani grad au mini Verdauig choenne aklimatisiere. Die wiitere Taeg in Mexico City beni de relativ gmuetlech aagange. Es esch eifach schoen gsi, weder zroegg zsi i dere gigantische Stadt. Ha mi grad wieder wohl gfuehlt i dem Doerfli. Das esch natuerli au a de mexikanisch-schwiizerische Gastfroendschaft vo de Violetta ond em Roman glaege. Viele Dank nomol a dere Stell :-)