Guayaquil

Letschti Station foer mech in Equador esch Guayaquil, die met oeber 3 Millione Iiwohner groeschti Stadt ond s'Wertschaftleche Zentrom vom Land. Guayaquil liit am Meer, was mol weder en wiitere Temperaturomschwong vo 10 of fascht 40 Grad bi nahezueh 100% Loftfuechtigkeit foer mech beduetet het. Aber Ochrut vergoht jo schliessli ned so schnaell ;-)

Vo do werd ich denne in es paar Taeg of Medellin ond vo dete wiiters nach Mexiko City zroeggfluege. Imene gmuetleche Hostal met Swimmin Pool han ich mech iiquartiert. In Guayaquil han ich vor gha, mech met de Katty, de Verlobte vomene Techkolleg z'traeffe, wo Equadorianerin esch ond wies de Zuefall het woelle, im Momaent grad ehri Familie do am bsueche esch foer es paar Woche. So semmer a mim erschte Obig z'erscht mol ofenes Welcome-Bierli gange. Eher Papi esch au debii gsi, esch wohl en Art Kontrolle gsi, met was foereme Kaerli siini Tochter sech jetzt wieder omeschloht. Esch aber ganz en sympatische Maa ond ebefalls Ingenieur, so haemmer eus zemmli gli guet verstande ;-)

Met de quasi offizielle Erlaubnis vom Papi het mer d'Katty i de noechschte Taeg "ehri" Stadt zeigt. S'Zentrom vo de Stadt esch voller Gschaeft ond a de Uferzone wo vor es paar Johr froesch oeberarbeitet worde esch ond entspraechend "Malecon 2000" heisst, hets Restauarant ond Kafis zom flaniere. Guayaquil het tourestisch ond kulturell allerdengs ned oebermaessig viel z'biete. Das het mech aber au ned wiiters gstoert, beni doch nach fascht 12 Woche reise au noemme i de Stemmig gsi, zom jedem Museom ond jedem architektonische Meisterwaerch nachezrenne onds z'bestuune...

So hani die Taeg am Morge gmuetlech am Pool ond d'Nomitaeg ond Oebe met de Katty ond ehrne Kollege verbrocht met Kaefele, Kino, Restaurants go aesse, chli i Uusgang go, usw... was mer halt so macht im Grossstadtjungel. Guayaquil ond sini Iiwohner esch mer raecht sympatisch worde i dene Taeg ond so hani en schoene Abschloss in Equador gha.

Mettlerwiile beni nacheme ziemlech aastraengende Flog-Marathon via Kolumbie wieder in Mexiko City aacho, wo ich vo de Violeta ond em Roman haerzlechscht empfange worde be. S'Programm vo de noechschte Woche stoht no ned woerkli fescht, drom weiss ich au nonig so gnau, wenns de noechschti Iitrag do geht :-)

Riobamba und la Nariz del Diabolo

Nach es paar sehr schöne Täg in Baños ond nach glendereter Sehnsocht nachem Bike esches wiiters nach Alausi gange. In Alausi startet de Zog öber die beröchtigit "Nariz del Diabolo" of guet Dütsch Tüüfelsnase. Dor miner gschäftlech bedengte Neigig zo dene Fortbewegismettel han ichs mer natürli ned wölle lo entgoh lo, de einzig no existierendi Zog in Equador au z'fahre :-)

Die Strecki esch früehner en Teil vo de Iisebahnlinie Quito-Guayaquil gsi, het aso die beide gröschte Städt vo Equador metenand verbonde. Nach de Privatisierig vo de Bahn esch aber wie in fascht allne Länder vo Latin-Amerika de ganzi Betrieb bachab gange, wöll d'Betrieber nome no s'Gäld usegnoh händ ond nüt meh in Onderhalt investiert händ. Das einzig no befahrne Stöcki werd denne au uusschliesslech zo tourestische Zwäcke betriebe, esches doch de spektakulärschti Teil vo de ganze Strecki gsi.

Met de alte originale 1.-Klasswäge, zoge vonere Diesellock (alles Meterspur, also wie d'WSB) esches also losgange rechtig Nariz del Diabolo. Esch zwar secher ned ganz vergliichbar met de Berninabahn, aber doch rächt Iidröcklech wie vor öber 100 Johr met ziemli viel Dynamit ond Bluet die Schiene i die änge Schlochte inegmeislet worde send. En ziemlechi Ingenieursleischtig, dörf mer doch gwössi Maximalstiigige ond Korveradie ned öber- bzw. onderschriite.

S'Highlight vo de Strecki send denne die beide Spetzchehrwändene öber d'Nase vom Tüüfel gsi. Muess mer sech so vorstelle, dass de Zog jeweils öber en Weiche ine Sackgass fahrt, d'Weiche omgstellt werd ond de Zog denne henderzi wiiters fahrt. Nach zwei Chehrene esch denne d'Lok wieder vore. Das ganze het de Name Tüüfelsnase becho, wöll de Hoger wo die Spetzchehrine droffe stattfiended met viel Fantasie uusgseht wie es Gsecht met Hörner ond d'Schiene vo de Bahn s'tüüflisch lächelnde Muul darstellt.

Ofem Wäg zrögg ad Küschte id Wärmi hani no en Zwöschestop in Riobamba iigleiht. Riobamba esch es gmüetlechs Industriestädtli wo ned viel touristischs z'biete het. Komischerwiis send das emmer die Orte, wo ich mech am wohlschte füehle ;-) D'Lag vo de Stadt esch aber scho ziemli spektakulär. Am Fuess vom höchschte Bärg vo Equador, em Vulkan Chimborazo (6300m) ond omgeh vo wiitere schneebedeckte 5 ond 6-tuusiger gsehts do chli uus wie i de Schwiiz. Das Tal wo Riobamba drine liit werd au d'Allee vo de Vulkan gnannt, send do innerhalb vo 300km insgesammt 22 Vulkän met ere erstuunleche Gliichmässigkeit je elf links ond rächts verteilt. Au het mer vo do no einisch de Tungurahua vo Baños vo de Röcksiite här gseh qualme. Ganz schöni Kulisse also gsi, das Ganze :-)

Baños

Nacheme gmüetleche Abschlossobe metem Clive händ sech eusi Wäge bereits weder trennt. De Clive het sech wiiters gmacht in Rechtig Peru, ich ha weder chli id Wärmi wölle, in Rechtig Baños.

Baños esch en Ferieort, wo au viel Equadorianer änegönd. Bekannt esch de Ort dank siine heisse Quelle wo dor de Vulkan Tungurahua gspiese werd ond do viel go kuure ond entspanne gönd. De Vulkan het sech au wonderschön presentiert, bi de Busfahrt nach Baños het mer ne iidröcklech öber de Stadt schlummere gseh. Do grad Ostere esch gsi, esch entsprächend viel los gsi do. Am Oschterfriitig esches öblech, dass mer vo Ambato, de nöchscht grössere Stadt die ca. 30km z'Fuess pilgeret, om d'Jongfrau vom heilige Wasser z'ehre. Ich be ehner do änecho zom chli i Wandere ond evtl. ändli mol es Biketürli z'mache.

Am nöchschte Morge hets e bezli grägnet gha ond ich ha mech ergendwie gwonderet, werom soviel Lüt met Atemmaskene omelaufed. Do das aber au gängig esch in Südamerika, wenn mer z.B. erchältet esch, hani mol nüt wiiters dänkt ond en chliini Grippewälle oder so hender dem ganze vermuetet. Au dass alli Auto so komisch met Dräcksprötzer verschlarget send, het mi ned wiiter nachdänklech gstomme.

Am Nomitag han ich mech meter Holländerin vom gliiche Hostal of es chliises Türli zomene Uusechtsponkt öber de Stadt gmacht. Mer händs de ergendwie scho chli komisch gfonde, dass alles so staubig esch. Wo aber denne bi euseres Wanderig s'erschte mol de Vulkan sechtbar gsi esch, esch au eus definitiv 20gi gheit. E riisigi Aschewolke esch sechtbar worde, die esch doch am Tag voräne nonig gsi!

Mer händ de es paar Iiheimischi aakuatscht. Die händ gmeint, das passieri so alli 6 Mönet ond seig ganz normal, im Momänt seig er ruhig. Mer händs aber doch zemmli iidröcklech ond au liecht gförchig gfonde. Näbscht de Äschewolke het de Vulkan vo Zyt zo Zyt au zemmlech luuti Grüsch vor sech geh, muess mer sech vorstelle, wie wenn en Düsejet wörd öber d'Stadt flüge. Of jede Fall en onvergässlechi Erfahrig, mol en aktive Vulkan vo de Nöchi z'gseh.

De Räschte vo de Zyt hani de met es paar Biketürli verbrocht. Eignet sech doch die Gägend do herrvorragend devör, do dank de Landwertschaft fascht of alli Höger ufe gueti Naturstrosse send. S'Material esch zwar ned ganz so guet gsi wie mini Perle deheime, aber zäme met de Höchi het das de Trainingseffekt nor no meh verstärcht, mue jo schliessli Fit sii wenn ich zrögg chome ond mette id Bikesaison iistige ;-)

Latacunga und Quilotoah

Nachdem ich vo de Galapagos weder zrögg im chalte Quito glandet be, han ich mer vorgnoh, no am gliiche Tag wiiters nach Latacunga z'reise. Da het aber bedütet, dass ich z'erscht mol a deses Ändi vor Stadt ha müesse, zom Terminal wo d'Büs rechtig Süde fahret. Binere Stadt wo 50km lang esch, duuret das so siini Zyt ;-)

Has de aber gschafft ond be guet in Latacunga aacho. Im Hostal hani denne min Cousin de Clive, wo in Ängland wohnt, troffe. Ich ha ehm bevor ich of d'Galapagos be, e Nachrecht gschriebe gha, dass ich denne do werde sii. Do de Clive aber metem Duume dor Latinamerika stöpplet, hani ned wörkli gwösst, öb das klappet. Om so grösser esch d'Freud gsi, wo er mer a de Reseption of d'Scholtere klopfet het.

Mer händ de no am gliiche Obig zemmli lang metenand gschwäzt, hämmer eus doch scho sit Johre nömme gseh, s'letschte mol wo mer no Kids gsi send. Scho wetzig, dass mer muess om die halb Wält reise, zom de Cousin weder mol z'träffe :-) Mer händ de ebefalls a dem Obe no entschiede, dass mer zäme es paar Täg wetted go wandere i de Quilotoah-Region.

Nach ere chorze Busfahrt det äne esches de losgange. D'Hauptatraktion im Quilotoah esch de gliichnamigi Krater, of 4100MüM obe meteme See drenenne. Die Gägend esch no sehr indigen prägt ond die Iiheimische behaupted denne au, de See heigi kei Bode - Geologe meine aber so om die 300m tüüf.

Am erschte Tag hämmer de wölle om de ganzi Krater omewandere, ca. 7km / 4-5h. För so zwe Sportskanonene vo Cousins setti das eigentli en Klacks sii. Aber scho noch ca. ere halb Stond het de Clive sech onwohl gfüehlt ond de Verdacht of Höhechranket esch uufcho. 4000m esch jo aber eigentli nüt, so hämmer entschiede, de Hike dorezieh. Im Clive het aber d'Höchi emmer meh zuegsetzt, so hämmer de s'Tempo drosslet ond die ganzi Rondi het sech chli i d'Längi zoge. Im Hostal hets de feins z'Nacht geh ond nach dem aasträngende Tag semmer Zyti is Bett bi Zemmertemperatur om 5 Grad. Do hani doch s'ersche mol min Schlofsack bruucht, hani ne wenigschtens ned ganz vergäbe dor halb Südamerika gschleppt!

Am nöchschte Morge eschs im Clive emmer nonig wörkli besser gange, so het er entschiede, zrögg zgoh of Latacunga. Ich ha aber nochli loscht gha, wiiterzwandere. So esch de Plan gsi, dass ich die erschti Etappe vo de 3-Tägige Wanderig no mache ond de am Obe of Latacunga zrögggange. D'Gägend dete hende esch sehr schön ond gemäss im Reisefüehrer esch de ganz Wäg guet z'fende, wöll beschelderet.

Ich be de met ere Reisende vo Frankriich los, mer händ de aber keis einzigs vo dene Schelder gfonde ond mer händs de mol of guet Glöck probiert. Onderwäx semmer de no ofenes Amerikanischs Pärli gstosse ond die händ eus de verzellt, dass die Iiheimische Indianer die Schelder wieder entfärnt händ, demet si sech als Guides chöned verchaufe. So esch mer de emmer wenn mer öpper nachem Wäg gfrogt händ aagschnauzt worde, d'Uuskonft choschti öppis oder mer sölled doch en Guide neh. Das hämmer de Partout grad äxtra ned gmacht, gönschti wäreds nämmli au ned grad gsi. So semmer de onder böse Bleck vo de Indianer of eigni Fuscht wiitersgange. Eigentli esches au ned so schwer gsi zoms fende, het mer doch grondsätzlech eifacht im Abfall, Fötzeli ond Petfläschene müesse nochelaufe vo de Wanderer voräne. Nacheme schöne 5h Marsch semmer de bim erschte Etappezil aacho.

Die ganzi Gschecht het mi scho chli nachdänklech gstomme. Merkt mer halt weder mol, dass in Equador de Tourismuss scho lang ond relativ gut uusbout esch. Entsprächend werd mer ehner als wandelnde Gäldbütel behandelt als wie als Gast. In Kolumbie han ich mech nie so gfüehlt, aber au in andere Länder wie Mexico oder Kuba ned, dete het mer sech emmer of Bsuecher gfreut. Es chliises Möschterli vo de equadorianische Gastfröndschaft hani de a dem Tag aber uusgrächnet vo dene becho, wonis am wenigschte demet grächnet ha. Vo dem Kaff wo mer nach de Wanderig aacho send, fahret leider ned so viel Büs in rechtig Latacunga zrögg. Wo ich de chli rotlos a de Stross gstande be, het es Polizeifahrzüg aaghalte ond mech gfrogt, wo ich änewöll. Sie händ de zuefällig au i die Rechtig müesse ond so händs mi es Stöck bes zo de nöchschte grössere Stross nach Latacunga metgnoh. Send zwei ächt nätti Type gsi ond mer sendsogar nochli met Blauliecht omegfahre. So het de Tag doch no es chliises Happy End gnoh :-)

Galapagos

D'Galapagos bestönd us 15 grössere ond meh wie hondert chliine Enlse im pazifische Ozean. Es esch en absolut onglaublechi Woche gsi ond definitiv s'High Light vo mim beshärige Tripp! Alli min Erläbnis do z'verzähle wörd grad nomol e Woche bruuche, aber ich probieres mol...

S'Galapagos-Archipel esch en natürlechi Einzigartigkeit wos ned viel vergliibars get. Vor Millione vor Johre send die Enslene ofgrond vo vulkanische Aktivitäte entstande. Dor die grossi Abgschiedeheit vom Feschtland (meh wie 1000km) händ sech so sehr vieli endemischi (Arte wos nor dete get) Tierarte entwecklet. Die Enslene händ sit je her e bewegti Gschecht hender sech. So send si während de Kolonialisierig vo de Pirate als Versteck bruucht worde ond spöter vom bekannte Biolog Charles Darwin för e längeri Zyt ondersuecht worde om siini bekannti ond bes höt wösseschaftlech anerkannti Evolutionstheorie z'grönde.

Am Sonntig em 10.4. esch aso mis Abentür losgange. Metem Flüger beni of Baltra gfloge, em Hauptfloghafe vo dene Enslene. Det semmer vo eusem Guide wo mi bim erschte Aableck an B.A. Baracous vom A-Team erenneret abgholt worde. Metem Bus esches of euses Deheime för die nöchschte 8 Täg gange, em chliine Sägelscheff de "Encatada". Die andere 10 Passagier send bereits an Board gsi, de Vinu en Kolleg us Ängland wo ich in Quito troffe han ond mer zuefällig usegfonde händ, dass mer de gliichi Trip buechet händ ond ich händ somet d'Besatzig komplettiert.

Nacheme feine Mettagässe hämmer Anker ufegholt ond send gstartet i eusi Enselchrüzfahrt. Of de ganze Tour hämmer insgesammt 11 Enslene bsuecht wo mer die verschiednigi Flora ond Fauna bewonderet händ. Jedi Ensle het sech dorch ehri grossi Abgschiedeheit andersch entwecklet ond esch so i ehrem Erschiinigsbeld einzigartig ond schön gsi. Euse Guide esch sehr loschtig ond onderhaltsam gsi. Mer alli händ siini grossi Liideschaft zo dene Ensle ond Natur wo er noch öber 30 Johr no emmer gha het bewonderet. Entsprächend met viel Elan het er eus das Paradies nöcherbrocht.

Jede Tag semmr mendischtens zweu Stonde am schnorchle gsi ond händ so au die vielfältigi Onderwasserwält kenneglehrt. Wasserschildchrötte, Mantas, Sting Rays, diversi Hai-Arte bes zom Hammerhai, Nemos ond tuusigi wiiteri vo farbige chliine Tropefesch, Koralle hämmer us nöchscher Nöchi chönne bewondere. Am Morge ond am Obe hämmer jewiils wonderschöni Sonneonder- ond Uufgäng chöne bewondere ond z'Nacht de Stärnehemmel bire frösche Seebrise vom Fahrtwend

An Bord semmer vo de Chochkönscht vom Augustin verwöhnt worde. Meischtens esch nachem z'Nacht de Anker gliechtet worde ond mer send ofere mehrstöndige Fahrt zo de nöchste Ensle tuckerlet (ab ond zue au gsäglet). Mer het gmerkt, dass mer im Pazifik esch, ab ond zue hets de Kahn doch zemmli doregschöttlet ond im einte oder andere en flaue Mage verpasst. Mim Chuehmage het d'See zom glöck nüt chönne aaha, Uuchrut vergoht ebe ned ;-)

Of eine vo de Ensle esch d'Charles Darwin Station gsi, s'Hauptquartier vo de Wösseschaftler. Sie versueched met aller Chraft, das Paradies z'erhalte ond vor frömde Iiflöss z'schötze. Es esch sehr wechtig, dass keini ander Pflanze oder Tier of die Ensle chömed ond das heikle Gliichgwecht störed. So wärded Rattene wo vor honderte vo Johre vo de Pirate iigfüehrt worde send ond d'Eier vo de Leguane ässed, aber kein natürleche Feind händ do bekämpft, gnauso wie weldi Huuschatzene wo vo Mönsche bi de Besiedlig im letscht Johrhondert iigfüehrt worde send, wo nochem Schlöpfe die jonge Wasserschildchrötte jaged, bevor die is Wasser chönned glange, usw... I dere Station esch au de "Lonesome George" e 80 jöhrigi Rieseschieldchrötte ond de letschti vo siinere Art. Mer haltet ne do met zweu Wiibli vonere "kompatible" andere Rieseschildchrötteart ond probiert so, die Art wieder uufz'zöchte, behär allerdings ohni Erfolg. Meh erfolg het mer metere andere Art gha, wos vor guet 30 Johr nor no eis Mändli ond ca. 8 Wiibli geh het. De Borscht het aber alles geh ond mettlerwiile meh wie 2500 Schildchrötte s'Läbe gschänkt, riifi Leischtig vo dem Kärli!

D'Zyt esch wie Flog vergange ond mer esch chum nochecho, die Erläbnis z'verarbeite. Leider eschs Ändi viel z'schnäll cho, hätt locker no e Woche meh chönne ometuckerle zwösche dene schöne Enslene. D'Abrondig vo dere ganze Tour send de super Guide, d'Crew wo en absolut familiäri Atmosphäre of dem Scheff gschaffet het ond die sympatische Mettoureschte gsi. Met ehne hani au en wonderschöne Geburtstag im wortwörtleche Paradies dörfe verbrenge.

Ich be bestemmt ned s'letschte mol of de Galapagos gsi ond cha en Uusflog dete äne nor jedem wärmschtens empfähle, wo mol dete i de Gägend setti sii. Die onglaublechi Schönheit ond Zerbrächlechkeit vo dem Paradies, wo eim au nachdänklech öber de Omgang vo de Mönschheit met de Natur macht, dörfe z'Erläbe esch es onvergässlechs Erläbnis.

Mitad del Mundo

Es Muss, wenn mer in Quito esch, esch de Bsuech vom Park Mitad del Mundo, wo d'Equatorlinie doregoht. Aso wenn mers gnau nemmt, het vor guet drühondert Johr en Franzos mol behauptet, dete gieng si dore ond es Monumänt änegstellt. Dete esch au de Park, toureschteattraktion #1 vo Quito met einige geografische Erklärige zom Equator ond eme Museom öber die verschiedene indigene Völker wos i dem Land get.

Vor es paar Johr het mer de met Helf vo militärischem GPS nomol einisch gnau nochegluegt ond festgestellt, dass de Franzos ned ganz rächt gha het ond de exakti Verlauf vom Equator rond 150m entfärnt liit. Komischerwiis het mer dete ganz i de Nöchi alti prehispanischi Pyramide gfonde, wo die zentrali Pyramide exakt in Nord-Süd-Uusrechtig ofem Equator liit. Emmer wieder erstuunlech, wie gueti Natur- ond Stärnekenntnis die alte südamerikanische Kulture gha händ, das tuusigi Johr vor Galileo, Kopernikus ond co.

Ofem rechtige Equator hets ebefalls en chliine Park wo eim einigi physikalischi Bsonderheite wo am Equator herrsched nöcher brocht wärdet. Onder anderem esch am Equator am 21.3. d'Sonne genau sänkrächt ond mer het drom kei Schatte (abgseh vom Ranze ;-)) Do das Datom nonig so lang här esch, esches au jetzt no ziemmli schwierig, es schattigs Plätzli z'fende. Wiiters send do au Sonneuhr erklärt worde, was rächt interessant gsi esch. Es send aber au es paar suspekti Experiment zeigt worde, wie z.B. d'Dreihrechtig vom Abfloss wo sech ofgrond vo de Koreolischraft (wo o.a. för s'Wätter verantwortlech esch) im Norde lenks ond im Süde rächts ome esch. Nach mim (ond Wikis) Wössenstand het d'Dreihrechtig ehner met konsturktive Gegäbeheite vom Siffon z'tue, als wie met de geografische Position. Im Experimänt het das aber tatsächlech fonktionniert, v.a. hets exakt of de Linie gar kei Strudel geh im Abfloss sondern es esch eifach grad abegflosse. Aber ich chome dem Trick secher no of d'Schlich ;-)

Am Nomitag hets de no e chliini Wanderig zomene ziemlech grosse, iidröckleche Krater i de nöchi geh ond es paar alte Ruine. Das esches de au gsi. Be langsam dore im chalte ond nasseQuito ond freue mi wörkli of mis chliine Geburigschänkli, 1 Woche Strand, Schnorchle ond Bötle i de Galapagos!

Cotopaxi

Om chli us Quito usezcho, hani e Tour ines Refugio am Fuess vom Cotopaxi, em zweuthöchschte Bärg vo Equador ond em angäblech höchschte aktive Vulkan vo de Wält buechet. D'Vulkän send i dem Land ond au rond om Quito allgägewärtig ond gänd eim bim Aableck scho ab ond zue chli es molmigs Gfüehl. Andersiits esch för mech aber au emmer beruhigend z'gseh, dass de Mönsch ebe gliich emmer nonig alli Naturgwalte im Greff het ond vor allem i settnige Regione no Respekt vor Muetter Ärde het.

Nach ere guet zweitstöndige Fahrt id Höchi beni bim Refugio aacho. Aagseit wäred es paar chliineri Wanderige i de Gägend ond en Uufstieg of ca. 5000MüM wo de Gletscher vom Cotopaxi aafangt. Ofgrond vo de schlächte Wätterlag esches aber leider bi de paar chliinere Wanderige bliebe, en Ufstieg zom Gletscher het sech of Grond vo de viele Wolke ned wörkli glohnt. So semmer de halt meh oder weniger 2 Täg i dem wonderschöne Refugio omeghänget ond händ eus d'Ränze vollgschlage, esch jo schliessli "All Inclusive" gsi ;-)

Emmerhin het sech am letschte Morge de Cotopaxi de doch no fascht ganz onbedeckt zeigt ond so hets emmerhin no e Föteli geh. Obwohl d'Gägend ond die chliine Wanderige sehr schön gsi send, esch die Aktion alles in Allem aber ehner en Reinfall gsi.

Quito

Mettlerwiile vor bald ere Woche beni i de Haupstadt vo Ecuador aacho. Quito het 1.4 Mio Iiwohner, spezielle esch aber, dass si nor knapp 3km breit esch, deför öber 50km lang i de Talschluuch vom Guyllabamba-Becki inegleit esch.

Quito esch e typischi südamerikanischi Stadt meteme schöne koloniale Altstadtteil ond eme moderne Gschäftsteil, wo d'Wolkechratzer id höchi rage. Abgseh vo es paar uusgedehnte Spaziergäng ond em Bsuech vom Casa de la Cultura, em Nationalmuseom, hets do ned viel z'tue geh. Ich ha den au Quito wölle als Basis för Bsüechli vom Vulkan Cotopaxi ond de Equatorlinie wo do i de nöchi esch.

Leider gets au in Quito kei wörklech guets öffentlechs Verkehrsmettel wie en U- oder S-Bahn. Es het wie in Bogota 3 Metrobuslinie wo paralell zonenand i de ganze Längi vo de Stadt verlauffed. Die send aber emmer total öberföllt ond ned grad bequem. Aber mer esch jo no jong ond abentürloschtig, drom han ich mer au das ned lo entgoh. Ond die erscht fahrt hets de tatsächlech au zemmli innsech gha. Leider gohts a de Haltestelle ned wörklech sehr gsittet zue, d.h. d'Lüt im Bus händ panik dass sie ned usechömed ond die andere, dass sie ned inechömed. So esch emmer es riiesigs Gmoscht ond Metrobusfahre in Quito scho fascht e sportlechi Betätigong. Mol denne gsi, hani de festgestellt, dass mer i de Metti vom Bus eigentli sehr bequem cha stoh, wöll d'Lüt us Angscht ned usezcho sech emmer vor d'Töre dränged. Es chliises Verkehrserziehigskörsli wörd do viellecht scho hälfe.... Dodemet esch aber s'Abentür nonig verbii gsi. De Busfahrer esch ehner eine vo de eiligere Sorte gsi ond het hüfig d'Töre scho zuetoh, bevor alli ii ond uusgstiege send. Ond die Töre do, die gönd zue, egal was dezwösche esch :-) So händ de met de Zyt die erschte Passagier aagfange de Busfahrer zrächtwiise. De het sech gwehrt öber Mikrofon, d'Lüt sölled sech halt chli aaständig verhalte ond denne het er aber es kollektivs Donnerwätter vo fascht allne Passagier z'ghöre becho. Im Aaschloss esch er denne schön süferli wiitergfahre ond de Pöbel het sech wieder beruhigt. D'Ruhe esch aber nor vo chorzer Duur gsi, nämmli bes en älteri Dame i einer Lüti "Ladron" gschraue het. Das heisst so viel wie Dieb ond denne hets aber ghäscheret im Neihchäschtli. De Dieb wo sech no probiert het uusezschnöre esch ned grad sanft vo ca. 4 för equadorianischi Verhältniss guet boute Manne festghalte worde. Alli Passagier händ de weder wie voräne scho im Kollektiv öberne abgschompfe, dass wäge so Lüt wie ehm das Land ned wiiterschiem ond en schlächte Ruef heig usw... A de nöchschte Haltestelle esch de Täter denne de Polizei öbergeh worde, die send de au ned grad ziemperlech metem omgange. Somet het d'Gerächtigkeit mol wieder gsiegt ond ich denne au a mim Zyl acho. Wenn au ned bequem, onderhaltsam send d'ÖV do definitiv ;-)

Söscht hani chli d'Vielfalt vo de equadorianische Chochi i diversne Restaurant uusprobiert ond ha mi no meteme Kolleg wo ich no vo Mexiko kennt ha es paar mol verabredet, er het mer denne chli s'Nachtläbe vo dem Städtli nöcherbrocht.

Otavalo und Laguna Cuycocha

Mettlerwiile han ich mech trotz einige kommunikationstechnische Problemli guet in Equador iigläbt. Es send jetzt doch scho einigi Ondersched zo Kolumbie feststellbar. Equador esch doch no sehr traditionell ond sehr viel Lüt laufed do no i ehrne indigene Trachte ome. Au schiints mer do generell nochli gmüetlecher zue ond härzgoh wie in Kolumbie, schiinbar het mer do nonig ganz die gliichi Arbetsmotivation :-)

Was mer aber au merkt, dass Equador scho einiges länger im Touri-Business esch wie sis Nochberland. So gehts do viel meh Hostals ond fascht alli Chelene ond Parks heusched zemmli saftigi Iitretspriise vo de Toureschte. Das im Gägesatz dodezue, dass Equador eigentli ärmer ond entsprächend au es tüfers Priisnivo het, bechonnt mer doch do es Mettagässe met Vorspiis inkl. Frochtsaft bereits ab 1 Franke. Dank dem dass de Moscht do nor 25 Rappe choschtet, esch au s'Busfahre sehr gönschtig.

Otavalo esch min erschti Stop ond vor allem bekannt dor sin gröschti indigeni Handarbetsmark vo ganz Lateinamerika wo jede Samschtig stattfendet. Dos grad so zuefällig gäge s'Wocheändi gange esch, han ich mer das natürli ned wölle lo entgoh. Demet mer vor de tuusige vo Toureschte wo äxtra wäge dem vom 3 Stond enfärnte Quito do änechömed händ chönne entcho, semmer äxtra am 8i am morge scho of de Markt gange. Ond Dimensione send denne au onglaublech gsi, bereits om de Egge vom Block vo eusem Hostal het er aagfange, ond das esch jo guet 4 Blocks vom eigentleche Marktplatz entfärnt. Die halb Stadt esch autofrei ond in Beschlag vo de Ständ öber ca. 6 of 6 Blocks gnoh worde. Es esch de au so zemmli alles aabote worde, Schmock, Alpaka-Stoff, Chleider, Traumfänger, Läderwaare, usw... ond alle schön farbig. Am morge esch au de beschti Momänt zom es wörklech guets Schnäppchen z'mache, wöll onder de Händler de Glaube omgoht, dass de erschti Verchauf Glöck brengt, je früehner er esch. So cha mer si denne zemmli wiit abemärte :-)

Do ich aber ned so viel förige Platz i mim Rocksack han, han ich au ned wörkli viel kauft. Es esch mer au uufgfalle, dass vieli Ständ die gliiche Sache im Aagebot händ ond ich mech scho chli gfrogt han, wie viel vo dene dargebotene Sache wörkli indigeni Handarbet send oder ächt doch us China oder so chömed.... Nichts desto trotz esch s'Ambiente onglaublech gsi ond Spruch des Tages definitiv "Poncho Amigo?" ;-)

Gäge de Mettag hämmer de aber s'Getümmel verloh, wöll wörkli fängs rächt viel Touris zwösche de Ständ omegwatschlet send onds entsprächend au fängs viel Bättler ond anders Gsendel gha het, wo eus beläschtiget händ. Das esch wohl au es Zeiche, dass mer sech i dem Land scho sehr a Toureschte gwohnt het ond en entsprächendi Näbeerschiinig. In Kolumbie esch das ossert in Cartaghena nie so gsi, aber werd wohl au no cho...

Am Tag vorem Markt beni mol weder of en Uusflog anen chliine Kratersee vomene verloschne Vulkan. Dete het mer of de Krete chönne rond ome laufe ond d'Secht of de See ond siini beide Ensle gnüsse. Esch e sehr schöni ond au weder einigermasse aasträngendi Tour gsi. Werde mi wohl nie rechtig a die Höchi gwöhne do :-) D'Enslene sälber cha mer ned bsueche, do d'Fauna för naturwösseschaflechi Zwäck isloliert bhalte tuet.

Nöchschte Stop esch de Quito, d'Hauptstadt vo Equador, met siine vielne Sehenswördigkeite. Vo dete werd ich denne ebefalls versueche en Trip of die famose Galapagos Ensle z'organisiere...

Equdor and lost in comunication

Be ohni Problem in Equdor aacho ond au Equador schiint es schöns Ländle zsii. Esch alles chli gmüetlecher ond chli traditioneller do wie in Kolumbie. Ergendwie hets aber de Kommunikationsgott grad gar ned guet gmeint met mer.

Us ergend eme Grond fendt mis Handy do keis Netz, muess do glaubs mol es ärnschts Wörtli met de Kollege vo de Swisscom rede, was sie weder för miesi Roamingverträg uusghandlet händ. Viellecht liits aber au eifacht a mim Handy.

D'Kollege vo de Cabelcom send leider ned besser, sit sie alles omgstellt händ of ehers neue Label ond Name, chan ich nömme iilogge of mis Mail.

Facebook streikt au. Mis Konto esch sit 3 Täg gsperrt, wahrschiinli wöll ich chli vo vielne verschiedne Komputer här druuf zuegreffe ha, was jo eigentli normal esch, wenn mer am reise esch.

S'einzige was im Momänt no fonktionniert, esch mini alti gmx-adrässe: schnopfli ät gmx.ch. do wäri aso erreichbar.

Also kei Grond zom d'Närve verlüre, falls ehr nüt vo mer ghöred. Do esch alles beschtens. So esch halt s'Läbe, wenn mer total abhängig vo de Kommunikationsmedie esch... Ich gange am Sonntig rechtig Quito ond hoffe, dass es de dete wieder chli besser goht ;-)

Saludos desde Ecuador!

Laguna de Coche

D'Laguna de Coche eschs Naherholigsgebiet vo de Pastusos. En See ca. e halb Stond vo de Stadt entfärnt. Esch an ond för sech nüt speziells gsi, öppe wie de Hallwylersee ;-) Speziell send die viele Holzchalet, drom werds au "Suiza pequenita" gnannt, was soviel wie chliini Schwiiz heisst. Hani natürli scho müesse go luege, öb mer do ned allefalls de Heimatschotz müesste aktiviere, aber ich glaube, das esch ned nötig. So viel met Schwiiz hets de doch ned z'tue gha.

Ha de meteme Bötli no en uusflog of d'Insle zmetzt im See gmacht wo mer en chliine Rondgang cha mache im Wäldli. Spannend eschs de doch no worde, nämmli of de Röckfahrt. Het doch de Motor uusgsetzt. So esch de das ganze no zonere zemmlech romantische Bootsfahrt worde, händ de Bötler ond ich eus doch vo händsche as Uufer zrögggruederet ;-)

Volcan Azufral - Laguna Verde

Höt esch mol betzli Sport ofem Programm gstande, demet ich ned grad komplett ohni Kondition in Sommer zr¨gg chome ;-) Am Morge am 6i het de Wecker glütet ond scho glii drof abe ben ich im Sammeltaxi rechtig Tuquerres onderwäx gsi. Das esch e Dörfli, ca. 2 Fahrstonde vo Pasto ergendwo i de Ande of 3000MüM ond gliichzytig Uusgangsponkt för d'Wanderig of de Vulkan Azufral met siinere wonderschöne Laguna Verde im Krater drenne.

Am 9ni esch denne aso met warme Chleider ond Fuetter uusgröschtet losgange. Leider eschs Wätter ned grad oberhammer gsi, aber om die Johreszyt dörf mer in Kolumbie glaub eifach froh sii, wenns ned rägnet. Die erschte 3 Stonde esches Uufwärts gange bes zom Refugio ond gliichzytig Parkiigang vom Vulkan. Dete tuet mer sech wie öberall för d'Statistik (oder de kolumbianisch Gheimdienscht ;-)) registriere. Dete hani de au no en andere jonge Kolumbianer troffe wo au ofem Wäg det ufe gsi esch. Met ehm beni de loszoge.

S'Wätter het ned wörkli besseret je wiiter ue mer cho send ond gäg de Kraterrand esches de emmer wendiger ond garstiger worde. De Kraterrand esch of ca. 4050MüM, zo de Lagune of 3600MüM abe im Krater esches de en zemmlech Steile Wäg met Träppe gange. Mer händ de Glöck gha, dass sech d'Wolke einisch chorz verzoge händ ond mer so doch no zo eusem "Kodakmoment" cho send :-)

Nach eme chorze Mettagsrascht semmer de ofgrond vo de frösche Temperature glii mol weder los. Voräne hämmers eus aber natürli ned lo entgoh, id "Lagune des Schicksals", wie si vo de Idianer gnannt werd, e Mönze z'wärfe ond eus öppis zwönsche. De Uuufsteg zrögg an Kraterrand het mi de nach de Pause ond ofgrond vo de Steili ond de Höchi de grad mol gschwend chli a mini konditionelli Gränze brocht.

De Absteg esch de einiges gmüetlecher gange ond je wiiters aber mer cho send, esch au s'Wätter weder aagnehmer worde. Am 5i am Nomitag semmer de zemmli kapott weder is Sammeltaxi rechtig Pasto. No es chorzes z'Nacht ond es Düscheli ond de beni totkapott i mis Bett gheit. Ned verwonderlech nach 8h laufe, ca. 24km met 1400 Höhemeter - do beni doch grad chli stolz of mech gsi. Aber das met de 5- ond 6tuusiger in Equador muess ich mer glaubs scho nomol öberlegge ;-)

Pasto

Nacheme meh oder weniger ruhige Fahrt entlang de Panamericana (ofgrond de viele Rägefäll in letschter Zyt het d'Stross es paar Schäde gha) beni guet in Pasto aacho. Pasto esch e klassischi kolumbianischi Stadt met ca. 500'000 Iwohner. D'Stadt läbt vorallem vom Handel met de vielne Agraprodukt us de Omgäbig ond em Wareomschlag met Equador. Obwohls i de Stadt sälber ned viel z'gseh get, esch mer do einisch meh uufgfalle, dass d'Kolumbianer es sehr es gschäftigs Volk send ond ehri neui Freiheit ond Secherheit wo si siit es paar Johr händ z'schätze wössed ond dra schaffet, das Land wiiters uufzboue. Das merkt mer dra, dass sogar am Morge am halbi sebni scho es regs triibe of de Strosse herrscht ond mer ofem Trottoir regelmässig vo Iiheimisch Lüt wo ergend wo he müend öberholt werd. Das esch mer söscht i de andere lateinamerikanische Länder nie passiert, be jo au ned de Langsamscht ;-)

Nach Pasto beni cho, demet ich einersiits ned so e langi Busfahrt nach Equador han ond wölls do i de Omgäbig no es paar Sehenswördikeite wie de Vulkan Azufral ond d'Laguna de la Cocha. In Pasto gets zemmli viel Chelene z'bewondere. Wöll sech d'Pastusos i de Vergangeheit ehner of d'Siite vo de Spanier gschlage händ ond es zytli lang sech sogar an Equador händ wölle aahänke, händ in Kolumbie leider ned emmer de beschti Ruef. So wärde eusi Öschtriicher-Wetz in Kolumbie met Pastusos gmacht. Fend ich aber ned onbedengt fair, gnau wie d'Öschtriicher send au d'Pastusos es Völkli vomene sehr nätte Schlag.

Eis High Light gets aber no us de Chochi i dere Gägend: Grillierti Meersäuli - Die send do chli grösser wie bi eus deheime ond schmöcked uusgezeichnet, händ en eigne Gschmack, am ehnschte bezli nach Chönnel :-)

Popayan

Nach San Agustin esches zrögg id Zivilisation gange. Popayan esch e gmüetlechs chliises Kolonialstädtli wo aber be wiitem ned so tourestisch esch wie Cartaghena. Entsprächend han ich mech do sehr wohl gfüehlt. D'Spezialität esch, dass do alli koloniale Hüser wyss agmolet send. Gseht rächt schigg us of jede Fall :-)

In Popayan sälber cha mer allerdengs ned viel mache ossert es bezli omelaufe. Do grad Wocheändi gsi esch, han ichs au ehner chli gmüetlech gnoh. Be de einisch meh i Gnoss vo de Gastfröndschaft vo de Kolumbier cho. Be spontan of e Stadtrondgang iiglade worde ond aaschlüssend sogar no zom z'Mettag bi dere Familie deheime.

Das esches de aber au scho gsi in Popayan. Wiiters gohts nach Pasto ond langsam aber secher rechtig Gränze zo Equador.

San Agustin

Nach de Wueschti eschs zroegg id Highlands vo Kolumbie gange. San Agustin esch de einzig Ort wo in Kolumbie Oeberraeschte vonere alte indigene Hochkultur gfonde worde send. Die haend vor allem sehr zeremoelli Graeber gha, wo sie met vielne Steifigure verziert haend. Leider weiss mer ned sehr viel oeber das Volk, woell sie kei Schreft gha haend. Of jede Fall haend sie sehr Naturbezoge glaebt ond ehri Goetter i de starche Tier vom Jungel gseh. So send Jaguar, Adler, Baer, Krokodil ond co. hueffegi Vorlage foer ehri Steifigure gsi.

Am erschte Tag haemmer einig vo dene Uusgrabigsstaettene hoch zu Pferde bsuecht. S'vermuetlech letscht mol wo ich ofeme Ross ghocket be, esch wohl vor einiger Zyt ofeme Ponny gsi. Entspraechend esch elei d'Riiterei scho es Erlaebnis foer sech gsi. Han ich doch ned woerkli en ahnig gha, wie mer so es Deng raenkt. Es Bike waer mer eigentlich doch lieber gsi. Aber no risk no fun, han ich mech denne of de Goeppel ufegschwonge. De Hobel esch de au zemmli abgange ond d'Waege wo mer dore send hani raecht aasprochsvoll gfonde. So esches oeber Stock ond Stei ond oeber Wassergraebe sprengend of Tour gange. Met de Zyt hani de das Graet raecht guet in Greff becho ond ha mi bald wie en chliine John Wayne gfuehlt ;-)

Am Tag druuf esches denne metem Jeep of Erkondigstour i die chli wiiteri Omgaebig gange. Beni doch raecht froh drom gsi, hani doch nach dem Rett es paar Drockstelle a mim Gsaess verspuert ;-) Mer send entlang vom Rio Magdalena gfahere wo dete i de Gaegend entsprengt ond de wechtigschti Floss vo Kolumbie esch. D'Natur vo San Agustin esch sehr hoeglig, gruen ond schoen. Oeberall gets viel Landwerschaft ond Chueh - fascht chli wie i de Schwiiz...

Wueste Tatacoa

D'Wueschti Tatacoa esch die trochnigschtig Gaegend vo Kolumbie. Es handelt sech i dem Fall aber ned woerklech om e rechtig wueschti Wueschti sondern ehner om en Ort wos ned ganz so viel Raegnet ;-) So esch in Fachchreise d'Red vonere sogenannte tropische Wueschti. Entspraechend han ich muesse feststelle, dass i de Raegezyt es ebe au i de Wueschti raegnet.

De zweuti Grond zom dete aenegoh, esch de klaari Hemmel ond die wenige Liechtemmissione wo dete herrsched. Z'metzt i de Wueschti hets es chliises Observatoriom wo mer au cha oebernachte. Zodem esch jo zwei Taeg voraene grad Vollmond gsi ond de esch jo im Momaent so noech wie scho lang noemme. Wo ich dete aacho be hets aber ebe zemmli abegloh ond ich ha mer ned choenne vorstelle, dass ich zobe ergend ein einzige Staern werde gseh. D'Luet dete haend mer aber de gseit, ich soell d'Naerve ned verluere, das tueeg de scho no uuf...

So hani de Tag dore mol es paar Wanderige dor die zemmli schlammig aber dorch die kuriose Felserosione doch sehr schoeni Wueschti gmacht. Ond tatsaechlech hets am Nomitag ghoert Raegne ond of d'Daemmerig aene hets scho raecht grossi Loecher im Hemmel gha.

Bim Iidonkle esch de de Master vo de Staernwarte cho. Woells i dere chliine Staernwarte zemmli aeng esch, het er vier tragbari Teleskop debii gha wo mer of de Dachterasse vo de Onderkonft uufgstellt haend. Mer send a dem Obe saechs Luet gsi ond de Meischter het eus 4 Stond lang allerlei Staerne ond Planete iigstellt met de Teleskop ond sehr viel spannends us de Astronomie verzellt. S'Highlight nach dere spannende Lehrstond esch denne d'Oebernachtig i de Haengematte onder dem gwaltige Staernehemmel ond dem schoene Mond gsi. Absolut en onvergaessleche Obe!

Bogota

Nacheme ruhige Flog ben ich i de Hauptstadt vo Kolumbie glandet. Bogota het fascht 8 Millione Iwohner ond esch somet die gröschti Stadt vom Land. Bogota liit of 2800MüM ond drom herrscht do s'ganze Johr ehner fröschi Temperature om die 18 Grad. Dor sini geografischi Lag rägnets in Bogota leider au ziemmli viel, nämmli 300 Tag im Johr, aso "very british" ;-)

Bogota esch en zemmleche Moloch. Die viele Lüt läbed of relativ ängem Ruum ond so esch of de Strosse emmer rächt viel los. Vor 15 Johre esch Bogota eini vo de gföhrlechschte Städt vo de Wält gsi. Das het sech aber gänderet ond dor e höchi Polizeipresänz esch Bogota mettlerwiile so secher wie alli andere Städt in Latinamerika, ...hani zommendescht so i mim Füehrer gläse. Of mim erschte Spaziergang, chorz nachem Iidonkle hani plötzli Schöss ghört ond gseh wie am Strosserand zwei Lüt zämebroche send ond wie zwe schwarkleideti Type met Maschinegwehr bewaffnet ofeme Töff mer entgägezfahre chömed . Ich, ond die andere Lüt wo au grad i de nöchi gsi send händ grad e rächte Schock gha ond händ eus de versuecht ergendwie imene Huusigang in Deckig z'hechte. Plötzli händ die bede Töffahrer of eusere höchi ghalte, de Helm abzoge ond eus zuegwonke ond metem Fenger d'Stross doruf zeigt, wo die beide andere zämebroche send. Do hämmer de gseh, dass dete Schiinwärfer ond Reflektore installiert send ond do grad Filmarbeite för en Telenovela oder dreiht wärde. Do hämmer de uufgatmet, ergend en elteri kolumbianischi Dame het de die beide Darsteller no zemmli zämegstuucht, wägem Schock wo si gha het. Rächt so, hätted jo chönne d'Stross abspere. Aber wer weiss, viellecht werd ich jo jetzt no en TV-Star in Kolumbie ;-)

Am nöchschte Tag esch denne of Erkondigstour gange. Leider hets Bogota verpasst, en Metro z'Baue. Statdesse händ en Art es Express-Bus-Netz uufbaue met eigene Busspure, zwei i jedi Rechtig. S'Netz het verschedeni Linie wo jedi e andere Buechstabe het. Jetzt eschs aber so, dass es drü Arte Büs get, dere wo öberall halte, dere wo öppe a jedere drette Haltestell halte ond Schnällbüs wo nor a de wechtige Chrüzige halte. Aber Usezfende wele Bus jetzt wo haltet esch ofgrond vo dene komlizierte Fahrplän fascht onmöglech. Au d'Kolombianer händ das ned wörkli im Greff, alli woni gfrogt han, händ mer ned wörkli chönne hälfe, si händ eifach d'Nommere vo ehrem Bus gwösst ond gwartet bes so eine verbiicho esch. Met chli Üebig esches denne aber gane.

In Bogota sälber cha mer allerdengs gar ned so viel mache, dorom hani nor drü Täg Uufenthalt planet do. Ha mer de Hauptplatz aagluegt, be ofem Huusbärg "Montserate" of d'Stadt go luege, ha es paar Pärks aagluegt, de alti Stadtteil ond de moderni met de Wolkechratzer. Be de au ofem höchschte no dobe gsi. Z'letscht beni denne no im Museo de Oro gsi, eis vo de bedütendschte Museom vo Südamerika metere riesige Sammli vo Goldhandarbeite vo de früehere Hochkulture. Esch zemmli Iidröcklech gsi, wie die das Handwärch im Greff gha händ ond schad wenn mer bedänkt, dass d'Spanier fascht alli die "Schätz" zo Goldbärre iigschmolze händ ond nach Europa brocht händ. Do grad Sonntig gsi esch, eschs au no gratis gsi, wöll in Kolumbie am Sonntig emmer alli Muesom freie Iitrett händ :-)

Als nöchschts gohts wiiters nach Neiva id d'Wüeschti Tatacoa. Dete setts de au weder chli wärmer sii, nach dem chalte nasse Wätter do.

Bye bye Leticia

Do ich ned so gnau gwösst han, wie viel Zyt ich in Leticia werde bruuche, han ich zom of Nommere secher goh, 6 Täg zwösche de Flög iigrächnet. Mer esch jo schliesslech ned jede Tag im Amazonas :-) So hani denne nach mim Trip no zwei Täg förig gha ond nochli Zyt zom mol chli nüt mache ond s'Städtli nochli gnüsse.

In Leticia machts of Grond vo siinere Grössi vo ca. 2x2km ond keine Strosse wo ergendwo äne gönd ned wörkli Senn, es Auto z'bsetze. So send denne die einzige Autos wos get vo de Polizei, de Chrankehüser, es paar Taxis ond Laschtwäge. Hauptfortbewegigsmettel i dem Städtli send Roller. Dere hets zo tuusigi. Ond vieli Iiwohner läbed devo, Lüt met ehrne Roller i de Stadt vo A noch B z'chauffiere, sogenanti Mototaxis. Au ich ha de Service viel gnötzt, esches doch emmer Abentürlech gsi bi dene Strosse ond Fahrstiil ond het nie meh wie 20 Rappe koscht. Wer tuet do scho laufe?! ;-)

Leticia esch mer ächt as Härz gwachse. Do nor ca. 12'000 Lüt wörkli i de Stadt wohne, lauft mer enand emmer weder öber de Wäg. De Füeher, em Coiffeur, de Lüt wo i de Läde oder Restaurant schaffe, usw... Ond alli send extrem fröndlech, erkenned dech grad weder (meischtens met Name!) ond händ emmer Zyt för es Schwätzli. So han ich mech nachere Woche scho zemmli deheime gfüehlt ond es esch mer schwer gfalle, wieder z'goh. De Abflog esch aber nomol Atemberaubend gsi, dasmol beni of dere Siite vom Flüger ghocket, wo mer au Iidröcklech nomol de ganzi Amazonas us de Loft gseh het.

S'nöchschte Zyl esch Bogota. D'Hauptstadt vo Kolumbie. Of 2800MüM werd mech weder es ehner frösches Klima erwarte, was mer ganz rächt esch, nachere Woche bi 33 Grad ond gfüehlte 300% Loftfüechtigkeit.

Welcome to the jungle! Oder das grosse Krabbeln...

Vo Leticia us hani en 3-tages Trip in Amazonas ine buechet, inkl. einere Öbernachtig diräkt im Urwald enne inere Hängematte. Am Morge vom erschte Tag semmer de aso chorz nach Sonneuufgang uufbroche meteme Motorbotli. Debii gha hani ned viel meh wie s'Zahbörschteli, d'Sonnecreme ond jede Menge Antibrumm. Z'erscht esches of Santa Rosa öbere gange, wo bereits in Peru liit, zom en Art es Immigrationsformular uusfölle, dass mer die nöchscht drü Täg im Urwald send. Somet mue mer ned jedesmoll bim Zollamt verbii, wöll bi eusem Trip wärde mer diversi Mol d'Gränze zwösche Brasilie, Peru ond Kolumbie wächsle. Ofem Wäg dete he semmer denne au grad diräkt öbers Drüländeregg dröbergfahre ond händ eus somet gliichzitig i drü Länder befonde.

Nachem Zollamt semmer denne de Amazonas ufegschipperet ond händ s'erschte Mol die ganze Dimensione vo dem Floss gseh. Wöll de Hafe vo Leticia imene Näbefloss vom Amazonas liit, esch eus bes jetzt z'Secht of de Hauptfloss verwehrt worde. D'Grössi vo de Floss esch atemberaubend. 2 Kilometer breit mue mer sech ehner vorstelle, als wie wenn mer ofeme See ohni Aafang ond Ändi befende tuet. Mer händ denne es Paar chliineri Dörfli entlang vom Amazonas bsuecht, wo vo Iiwohner indianischer Härkonft besiedlet send gsi. Amazoninen hämmer aber zo euserer grosse Enttüschig niened aatroffe ;-)

Nochem Mettagässe i eim vo dene Dörfli esch denne s'eigentlech Abentür losgange. Do im Momänt Rägezyt esch ond de Amazonas bald sin Höchschtschtand erreicht het, esch sit ca. ere Woche es ca. 40km langs Näbeflössli befahrbar gsi, wo zom See Zacambu füehrt, ond das Flössli jetzt tüf gnueg esch. Es het sech denne usegstellt, dass mer tatsächlech eis vo de erschte Bötli gsi send, wo det dore send. De ganzi Floss esch met Alge/Schelf/Seerose-Teppech verwucheret gsi, wo ca. mehreri Hondert Meter lang send gsi. D'Konscht esch denne för euse Füehrer gsi, dor die Teppeche de gschmeidigschti Wäg z'fende, wo am wenigschte verwachse gsi send. De Guide het de aber bereits bim erschte grössere Teppech s'Bötli so rechtig feschtgsetzt. Erscht nachemee ca. halbstöndige Kamp met Rueder, Machete ond allne andere mögleche Gägeständ wo mer gfonde händ, semmer weder us dem Schlammassel usecho. Do hämmer (be meteme Australier ond 2 Ängländer of dere Tour gsi) eus de scho s'ercht mol gfrogt, öb mer do ächt die rechtige Guides verwötscht händ.

Nochäne esches denne aber emmer besser vorwärts gange. De Guide het de Treck langsam dosse gha, metem Route bestemme. Met de Zyt esch denne das Flössli emmer meh zomene Flössli worde ond teilwiis esch de Platz zwösche de Bäum nömme viel breiter gsi wie euses Bötli. Emmer weder hämmer met vollem Iisatz met de Machetene müesse Liane ond abehängendi Äscht entfärne. Aber so hämmer us nöchschter Nöchi chönne de Urwald bestuune, sogar Tarantle (Vogelspinne) a de Baumstämm hämmer gseh. So semmer wohl glich ned ganz so schnäll vowärts cho, wies eusi Guides dänkt händ. Of jede Fall esches scho schwer am Iidonkle gsi ond mer händ d'Stell för euses Nachtlager nachwievor nonig erreicht. Met Taschelampe bi völliger Donkelheit hämmer eus de wiiters dor de Jungelbach gschlage. De Vorteil a de Nacht esch gsi, mer händ denne d'Insekte wo die ganz Ziit of eus abegheit send, au nömme so gnau gseh ;-) De Bach het sech denne au emmer weder gablet ond eusi Guides send sech diversi mol ned wörkli einig gsi, wele Wäg si müend neh ond mer händ eus einisch meh gfrogt, öb ächt das e guete Plan esch gsi.

Tatsächlech semmer denne plötzli ane chliini Liechtig cho wos Nachtlager esch gsi. Fürstell ond Hängematteuufhängvorrechtige send dete bereits vorbereitet gsi, aber do mer wohl die Erschte send gsi i dere Saison, hämmer au das bi völliger Donkelheit no müesse härrechte. Vom Lagerfür hets denne no e Wörschtli geh, bevor mer denne zemmli kapot i eusi Hängematte kröglet send. D'Grüschkulisse esch onbeschriiblech gsi. Z'erscht scho bi de Dämmerig s'Gschrei vo de Brüllaffe ond nachäne i de Matte das Surre, Zische ond Zirpe vo all dene Insekte. Wenn mer ofs Hüsli het müesse met de Sternlampe esch onglaublech gsi, wenn mer a Bode zöndet het, het sech eifacht alles bewegt. Trozdem han ich e sehr aagnehmi Nacht im Urwald verbrocht, nach dene Aasträngige de Tag dor hani sehr guet gschlofe.

Am nöchschte Morge semmer met de Sonne zäme uuf ond scho glii wiitergfahre. Nach ca. 2h semmer denne zom Zacambu-See cho, wo au eusi Jungellodge, bzw. s'Lager för die zweuti Nacht esch gsi. Dete hämmer de Zmörgelet. Nachem z'Morge esches met Kanus ab of de See, wo mer i no chliineri Flöss inesend go Flora ond Fauna bestuune. Nach dem sportleche Morgeprogramm esches met Sport ondeme wiitere Highligh wiitersgange: Piranhafesche :-) Met Pouletstöckli am Hoge semmer of d'Jagd nach dene chliine Racker. Obwohl sech Piranhas vo Natur uus sehr gärn of d'Fleischstöchkli störzed, esches gliich ned so eifach gsi, die Cheibe z'fange. Mer het es Zocke a de Leine gspürt, ond wenn mer denne d'Schnuer usezoge het, esch kei Köder meh am Hogge gsi, aber au kein Fesch. Wenn mer ned sofort bim Zocke a de Leine zemmli rasch aber gliich met Gfüehl zoge het, esch de Fesch emmer schnäller gsi. Met de Zyt hämmer denne aber de Treck dosse gha ond do de Piranha en "Schwarmfesch" esch, hämmer euses Zmettag nachäne im Minutetakt usezoge.

Obwohl ned sehr Fleisch dra, esch de Piranha en sehr schmackhafte Fesch. Nach dem feine Zmettag esch denne s'Urwaldprogramm wiiters gange. Mer send of Floss Yavari, wo de einisch in Amazonas möndet, go Flossdelfin beobachte. Wörklech iidröcklechi Tierli. Leider han ich fascht keine metem Föteler verwötsch. Do sechs leider ned oms Seaworld het ghandlet, send sie emmer nor gschwend zom Lofthole uuftaucht ond de weder verschwonde för 4-5 Minute ond secher ned weder am gliiche Ort uuftaucht. So beni de halt meischtens z'Spot gsi ;-)

Zrögg i de Lodge hets z'Nacht geh ond metem Iidonkle semmer de nomol of de Floss go Kaiman ond Krokodil luege. Eigentli gseht mer ned viell, nor ehri lüchtende rote Auge wenn mer met de Taschelampe is Schelf zöndet. Ond dere Augepaar het mer wörklech sehr viel gseh. Esch glaub om die Zyt ned so gsond zom bade im See ;-).

I dere Nacht semmer am morge am 1 nomol uufgstande ond of en stöndige Urwaldrondgang z'Fuess. Au das esch sehr interessant gsi, wöll mer nomol die ganzi Grüschkullisse us nöchschter Nöchi het chönne gnüsse. Gseh het mer ned so viel, do mer im dechte Urwald au met Taschelampe ned wiit gseht, v.a. Moskitos in Heerscharen hämmer gseh, mer cha glaub säge, de Urwald vom Amazonas esch ei grosse Moggeschwarm ;-)

Am drette ond letschte Tag hets nomol en uusgedehnte 4stöndige Marsch dor de Urwald geh. Euse Füehrer het eus alli Pflanze ond Insekte erklärt, au was d'Uuriiwohner för Heilmettel druus mached. Mer händ de wederom Affe ond au Vogelspenne gseh. Grondsatz im Urwald: Nüt aalänge, was ned onbedengt nötig! Nachem Mettagässe semmer de nomol go Piranhas fesche, wöll mer so Spass dra gha händ ond denne esches de au scho of die ca. 3stöndigi Röckfahrt nach Leticia gsi. Es absoluts onbeschriiblechs Erläbnis, aber ergendwie esch mer denne gliich au froh gsi, weder zrögg i de Zivilisation z'sii, bzw. v.a. us dem riese Moggeschwarm dosse z'sii. Ich be glaub met ca. 20 Steche no relativ guet devo cho :-)

Leticia

Mis nöchschte grosse Abentür verschloht mi is chliine Städtli Leticia. Metem Flüger esches vo de Karibikküschte via Bogota einisch quer dor s'ganze Land gange, bes a deses Ändi. Met dem Flog hani au de Equator öberschrette ond be somet rein hypothetisch vom Wenter in Sommer gfloge :-)

Leticia liit diräkt am Amazonas, em gröschte Floss vo de Wält, ond gliichzitig im Drüländereck Kolumbie-Brasilie-Peru. Die Stadt esch nor per Scheff vo Peru oder Brasilie erreichbar, bzw. per Flüger. Strosse füehred do keini äne. Scho elei de Aaflog of das Städtli esch einzigartig Iidröcklech gsi. Minutelang nor Wald ond Grüen, soweit das Auge reicht. Onglaublech, die Dimension vo de Longe vo eusere Muetter Ärde.

Do in Leticia esch alles es bezli andersch organisiert. Kommunikation lauft alles öber Satellit, entschprächend esch de Handyempfang zom Teil met Onderbroch ond s'Internet wo söscht eigentli i dem Land sehr guet fonktionniert, lausig. Dorom gets im Momänt au no keini Föteli, wenn i die wör uelade, wörd de Satelit äuä grad abstörze ;-)

Nahtlos aagränze a Leticia tuet s'brasilianische Städtli Tabatinga wo mer ohni dor de Zoll zmüese chan för en Tag bsueche. In Leticia sälber cha mer ned sehr viel mache, es esch aber en herrvorragende Uusgansponkt för Expiditione in tüüfi Urwald vom Amazonas. Do i de Gägend send diversi Naturschotzgebiet aagsiedlet wo mer cha för mehreri Tag bsueche ond au im Urwald öbernachte. Ond gnau das esch au min Plan, de Urwald mol us nöchschter Nöchi chönne z'Erläbe!

Parque Nacional de Tayrona

Met liechtem Gepäck beni för en Zweitagestrip in Nationalpark vo Tayrona uufbroche. De Park esch eine vo de ältischte in Kolumbie ond zogliich de beliebteschti bi Touris sowie Iiheimische gliichermasse. Ich ha mi dete vor allem of d'Suechi nacheme ändlech mol schöne Karibikstrand gmacht. Viel meh wie d'Badhose hani aso ned debii gha :-)

Im Park cha mer vor allem am Strand ond i de Wälder wandere oder ebe bade. Ich be am erschte Tag ca. 4 Stonde bes zom henderschte Strand gloffe ond tatsächlech, ich hane ändli gfonde, de perfekti Strand! Dete hets denne en chliine Campingplatz gha, wo ich onderem freie Sternehemmel mini Hängematte uufghänkt ond öbernachtet han. Dete hani no es paar Argentinier wo ich in Medellin kenneglehrt han weder troffe ond met dene hets de no e gmüetleche Obe geh.

Am nöchschte Tag, nachere wonderschöne Nacht i de Hängematte beni met 3 vo dene Argentinier de früeh use ond mer händ bes am 11i de Strand quasi för eus elei gnosse. Nochäne esch wieder Sport aagseit gsi. En 5stöndigi Wanderig ofeme alte Indianerpfad öber en 1000m höche Pass zrögg ad Hauptstross rechtig Santa Marta. Esch zemmli aasträngend gsi, öber Bäch, Baumstammbrogge ond grossi Felse hämmer dem schmale, steile Pfad müesse folge. Aber es het sech definitiv glohnt, en hammerschöne Wäg ond en guete Iibleck id Flora entlang de Karibikküschte esch de Lohn gsi.

Jetzt esch aber verbii met omflohnere am Strand. Morn goht mi Flog einisch quer dor ganz Kolumbie nach Leticia in Amazonas. Be gspanne, was dete of mech wartet.

Carneval de Barranquilla

Barranquilla esch en Industriestadt a de Karibikküscgte vo Kolumbie ond insofärn us tourestischer Secht ned witers erwähnenswät. Ossert eimal im Johr, zo de Carnevalszyt werd Barranquilla zom Partymekka ond es fendet dete die gröschti Sause vo Kolumbie statt. Do ich grad i de Gägend be gsi, han ich mer das natürli ned wölle lo entgoh :-)

De Karneval goht vier Täg ond a jedem send Omzög zomene andere Thema. Ich be am Sonntig gange, wo de grossi traditionelli Omzog stattfendet normalerwiis. De Omzog sälber esch denne ned grad so Rio-Mässig gsi, wie viellecht veli vo euch (sowie ich au) dänked. Es send dete wörkli vo Jong ond Alt die verschiedene Trachtene vo allne mögleche Ortschafte us ganz Kolumbie presentiert worde. De Omzog esch de au fascht onändlech lang gange, vom 12i bes am 6i.

Do de Omzog ned wörkli im Zentrom vo Barranquilla stattgfonde het, beni de gar ned is Zentrom ine go wiiterfeschte, sondern aaschlüssend wieder zrogg nach Santa Marta. Also schön aaständig ;-)

Santa Marta

Nachdem ich in Cartagena noch drü Täg zemmli en Öberdosis Tourismus gha han, han ich beschlosse, es Städtli wiiterzzieh. S'Schlemme a dene Touriort esch halt, dass mer als so ned kolumbianisch uusehende wie mech a allne Egge vo ergendwelche zwielechte Händler aakuatscht werd, wo eim Uhre, Sonnebrölle, ächti Rolex, kubanischi Zigarre ond no viel welderi Sache wänd aadreie. No fascht schlemmer fendi, dass au jede seriösi Markstandhändler s'Gfüehl het, wöll jetzt do en Tourescht chonnt, cha mer eifach mol s'Drüfache höische.

So beni wiiters zoge nach Santa Marta. St Marta, am Fuess vom Pico Cristobal Colon, em met 5775m höchschte Bärg vo Kolumbie, wär eigentli ebefalls es legendärs Kolonialstädtli wo i siinere historische Gschecht i de grosse Schwöschter Cartagena ned viel nochestoht. Aber Santa Marta hets ergendwie nie wörkli gschafft, sech im Tourismus z'etabliere. So send doch vieli vo de ehemalige Kolonialgebäude am verlottere oder bereits abgresse worde. Santa Marta läbt hauptsächlech vo de Kohleindustie wo im nohlegende Gebirge "Sierra Nevada" abbout werd ond vom Hafe diräkt nach US&A verschippert werd. So gsehts denne au ziemli ongsond uus, wenn die vorwiegend kolumbianische Toureschte am Strand bade, wo 500m wiiters osse die gröschte Frachtscheff in Hafe fahred.

Ich nötze Santa Marta ebefalls als Absprongponkt nach Barranquilla, em gröschte Carneval vo Kolumbie. Höt esches bereits losgange ond au in Santa Marta hani bereits de erschti Omzog dörfe meterläbe. Do esch wörkli s'ganze Städtli osem Hüsli ond scho die ganzi Woche send Autos ond Hüser dekoriert worde. Es tüend sech au alli verchleide do, Manne als Fraue ond Fraue als Manne ond Wissi als Schwarzi ond vor allem Schwarzi als Wiisi. Es esch sowieso en Tradition am Karneval, dass mer enand tuet met wiisem Spraydoseschuum oder eme wiise Polver gägesiitig aastriiche. Oder so wie mer früehner ned ganz Korrekt gseit het, d'Neger wärde gwiisget :-) Neger, bzw. Negro esch i de Latinamerikanische Länder öbrigens keis Onwort, zomendescht onder de Donkelhütige Iiwohner esches ganz normal gebrüchlech.

So, jetzt weder ab an Carneval. Mol luege was in Santa Marta am Obig no abgoht wenn Carneval esch. De nöchscht Brecht werd de vom grosse Carneval in Barranquilla sii.

Cartagena

Cartagena esch es schön restaurierts Kolonialstädtli a de Karibik. Omgeh ond gschötzt vo höche Muure ond mehrerne Feschtige loht sech erahne, was do zor Zyt vo de Eroberige ond Piraterie abgange esch. Onder spanischer Flagge esch Cartagena de Uusgangsort för d'Onderwärfig vo de Indianer in Kolumbie sowie wiite Teile vo Peru ond Venezuela gsi. Höt esches eis vo de bekanntischte Tourizyl in Kolumbie, au wöll of de zueghörige Halbensle dutzendig vo 1. Klass-Betonbunker errechtet worde send wo d'Masse ehri Pauschalferie verbrenge.

Ich be de no s'Fuerte de Paselillo go aaluege, d'Hauptfeschtig wo de Hafe gäge Aagreff vo See beschötzt het ond gliichzytig au de Hauptzuegang vo Land im Visier gha het. Iidröcklech send die viele Gäng, Lagerrüm, Uufenthalts ond Schlofsäl i de Muure enne gsi, wo mer do zemmli Räschtlos alli cha begoh. Es zemmlechs Labyrinth, wo mer sech zo Zyte vo Fackelbelüchtig secher no reng drenne verlaufe het chönne.

Do ich i mine Reise doch scho es paar vo dene Karibikstädt gseh ha, eschs för mech Cartagena nömme so öppis speziells gsi. Ich be mettlerwiile als Reisende sogar zemmlech skeptisch gägeöber vo so Orte. Zwar het mer dor d'Restauration vieles erhalte, aber au gliichzytig s'eigentleche "Stadtläbe" uusglösche. Met de Renovation send tüüri Hotels, Restaurands ond Designerläde id Stadt iizoge ond en normale Kolumbianer cha sech s'Wohne im Zäntrom nömme leischte. Mer schiint, de Treck esch, alli Hüsli schon farbig aazmole, no en UNESCO-Wältkulturerbe-Stämpfel druuf ond fertig eschs Kolonial Disney World för d'Pauschal- ond d'Karibikchrüzfahrttoureschte.