Montag, 29. Dezember 2008

Tour Arbol de Tule bes l'hierve de agua

Am Wocheaend esch mol weder s'Touriprogramm ofem Tagesplan gstande. Haend en Tour met mehrerne Sehenswoerdigkeite i de Gaegend buechet. Die esch de au mol weder schoen mexikanisch poenktlech 45min z'spot los gange :-) Als erschts semmer de Arbol vo Tule go aaluege. Das esch de groeschti Baum vo de Waelt vom Dorchmaesser haer, goend 32 Moensche rondome wenn sech alli d'Hand gaend. Esch raecht iidroecklech gsi. Nachaene semmer en Indianischi Teppechwaeberei go aaluege, das esch aber ehner de Kafifahrtmaessigi Teil gsi, wosi eim de halt die Teils au haend wolle aatreie. D'Ruine vo Mitla send s'noechschte Ziil gsi. Ned sehr spektakulaer gsi, woell s'meischte gar noemme gstande esch, woells d'Spanier im 16 Johrhondert zerstoert haend zom eigeni Chelene boue met dene Stei. S'noechste Ziil esch denne Hierve de l'Agua gsi, versteinereti Chalchwasserfaell. Sehr iidroecklech gsi, leider esch d'Sonne scho waeg gsi, so esch s'gruen-blaue Chalchwasser noemme so rechtig zor gaeltig cho. Am Schloss semmer de no en Mezcaleria go aaluege ond natuerli go degustiere. Met defoer ca. drue Stond verspoetig semmer finalmente weder in Oaxaca gsi. En aastraengende Tag aber defoer viel gseh.

Montag, 22. Dezember 2008

Feliz navidad de Oaxaca

Die erscht Woche esch ome ond ich ha mech beschtens iiglaebt in Mexiko. Mini Gaschtmuetter get woerkli alles i de Chochi, mer waerde kulinarisch verwoehnt vom feinschte. Emmer weder hets neue Oeberraschige debii, oeppe d'Haelfti vo de Froecht ond Gmuess wo mer do so isst, kennt mer gar ned bi eus i de Schwiiz.

Au i de Schuel gohts zuegig voraa, de Kors esch woerkli zemmli intensiv. Defoer chani doch scho es paar Saetz met de Iiheimische quatsche do. D'Mexikaner send sowieso emmer mega naett. So semmer am Samschtig vo es paar Mexikaner wo mer eigentli gar ned woerkli kennt haend spontan ofene Party iiglade worde. Das Huus het e fetti Dachterasse gha wo mer gmuetlech oeppis gaesse het ond im spoetere obe hani denne no en chliine Crashkors im Salsatanze becho.

S'Laebe esch sehr tranquilo do. Nach de Schuel cha mer dor die aendlose Maerkt doreschlaendere, do gets woerkli alles zom chaufe. Oaxaca esch ebefalls e Hochborg foer Schoggi, die gets do in allne Forme. Ha aso nor maessig choenne Iidrock mache, met dere wo ich us de Schwiiz metbrocht han :-) Zobe trefft me sech ofem Dorfplatz ond goht de gmeinsam go z'nachtaesse ond nochaene no of es Bierli oder en Mezcal.

Wiehnachte esch sehr hoech aagseh do in Mexico. Bi vielne Hueser gseht mer es regelraecht wettroeschte met Wiehnachtsdeko ond Chrippespieli. Die 9 Taeg vor Wiehnachte werd denne au jede Tag gfiiret do, so soelled ergendwie die 9 Moenet vo de Schwangerschaft Maria dargstellt waerde. Foer d'Chend waerde grossi Kartonbehaelter met Suessigkeite baschtlet, die waerde de Uufghaenkt ond d'Chend muend de probiere die met verbonde Auge meteme Stock obenabezschloh. Wenn de entscheidendi Traeffer glandet esch, verplatzt de d'Pignata, wie das Teil heisst ond alli Chend stoerzed sech of d'Suessigkeite. Sehr loschtig zom zueluege. Bi eusere Gastfamilie semmer am 24. of e grosses Wiehnachtsfescht (Posada) iiglade wo de ca. 50 Luet waerde sii, werd secher au spassig.

Auso, bes zom noechschte Mol. Liebi gruess us Mexiko ond allne ganz es schoens Wiehnachtsfescht, Chregu

Monte Alban

Am Samschtig esch s'erschte mol Touriprogramm ofem Tagesplan gstande. Metere organisierte Tour (natuerli of Spanisch) esches of de Monte Alban gange.

Die zwaenzgminuetig Fahrt het mol Mexican-Style met rond ere viertelstond verspoetig aagfange. Ebefalls im Mexican-Style semmer en aengi, korvigig Baergstross doruf of de Monte Alban gfahre, s'Morgeaesse het jedefalls no einisch chli am Gorgeli kuzelet :-)

Wohlbehalte dobe aacho, het me de Aafang vo de Piramideaalag vo de Zapoteke welles gliichzytig eini vo de erschte Hochkulture gsi esch in Mexiko (so ca. 1000 vor Chreschtus bes 1000 nachaene) bereits gseh. Die haend en zemmli iidroecklechi Aalag uufgstellt det obe ofere Flaechi vo ca. 1000x1000 Meter. Die haend au astronomisch scho so einiges ofem Chaschte gha, met Kalaender, Staernwarte, usw...

De Fuehrer het alles schoen Uusfuehrlech erklaert ond sogar aextra laengsemer gschwaezt, demet d'Schwiizer au nochemoege haend. Nochaene haemmer de saelber no guet zwei Stonde Zyt gha zom d'Aalag of eigni Fuuscht erkonde.

Was secher mine Jungs vom Tornverein gfalle haett, z'metzt of de Aalag haend es Fuessballstadion gha. D'Zapoteke haend de Sport scho vor oeber 2000 Johr zelebriert. Esch aber damals glauebs no einiges aastraengender gsi als hoet. Si haend met ca. eme 4kg schwere Kautschuball gspielt ond om Verletzige vorzbuege sends aehnlech wie Rugbyspieler aagleit gsi. Einzig d'Verluerermannschaft het dete woerkli verlore, die send de amix de Goetter gopferet worde :-)

Dienstag, 16. Dezember 2008

Oaxaca

Oaxaca esch es verschlofnigs Staedtli ond sehr schoen, oebarall hets die typische Hueser in allne Farbe. S'Laebe fendet of de grosse Plaetz ond Maerkt statt. D'Parks lade zor gmuetleche Siesta ond am obig cha mer i de dutzende Strossebeizli en Serveza zwitschere.

S'einzige was do woerkli kriminell esch, send d'Autofahrer, wenn mer do oeppis passiert, de werdi bim Oeberquere vome Fuessgaengerstreiffe aagfahre. Obwohl mech emmer weder erstuunt, dass mer bi dene Tempohuegel (wo secher jedes zweute Schwiizer Auto ned droeberchiem) kombiniert met de Schlagloecher so schnaell cha fahre. Liit wohl no a de guete alte duetsche Wertarbeit, do onde esch tatsaechlech no jedes zweute Auto en VW-Chaefer ;-)
Aber ich be jo eigentli ned nor foers Touriprogramm nach Oaxaca cho. So esch de am Mentig Morge au scho los gange metem erschte Block Spanisch. Die erschte zwe Taeg send zemmli heftig gsi, min Chopf het jewiils zemmli graeucht nach 6 Stonde was s'Tagespensum esch. Zom Gloeck cha me nochaene de Chopf meteme Serveza weder abchuele. Aber die erschte Erfolg send bereits ersechtlech, so verstohni doch scho einiges ond cha scho die erschte Saetz zaemebroesmele in Spanisch. D'Schuel esch super, d'Lehrer send sehr froendlech ond fordere zemmli. I de Schuel esch im Momaent ned so viel los waege de bevorstehende Wiehnachte. Es het vorallem Luet us Kanada ond es paar Duetschi. Ich be meteme Koelner (alaf!) ond eme Aenglaender i de Lerngroppe.
Am Mentig morge han ich no mini beide Metbewohner kenneglehrt wo au bi dere Gastfamilie send. Tamara ond Janik, wie us de Naeme onschwer erkennbar esch, beides ebefalls Schwiizer. Hoffe mol, ich lehre trozdem nochli Spanisch do, sie haend gmeint, sie lueged de scho dass ich ned zviel Duetsch rede :-)
Obwohl Tacos met scharf Soss zom Zmorge zwar betzli gwoehnigsbedoerftig send, hani mi scho zemmli aklimatisiert do. Esch au ned schwierig bi 25 Grad, a dere Stell e Gruess id Schwiiz, hehe. Ich be aso beschtens im Mexico glandet.
Noechscht mol gets de nochli meh vo Oaxaca ond miner Gastfamilie. Ich sett jetzt nochli go Uufgabe mache, soescht het min Maestreo morn de kei Freud ;-)
¡Hasta la proxima!

¡bienvenido en mexico!

Nachdem ich en Tag vorem Abflog erfahre han, dass es eigentli nor ein Floghafe get wo no schlemmer esch wie de in Mexiko, naemmli de in Paris, beni frohen Mutes uufbroche, werd ich doch i de noechschte 24h met beidne s'Vergnuege ha. Es het denne au scho in Zoeri demet aagfange, dass ich de Flog ned ha choenne bes Mexiko dorechegge. In Paris de fertig iicheggt ond nach ca. 1/2h dor de Floghafe laufe ond 1h am Secherheitstschegg aastoh beni de am Gate aacho. De Flueger esch de in feinschter Mañana-manier met rond 2h Verspoetig gstarted. Do beni doch scho mol gspannt gsi, was mi in Mexiko ersch erwartet...

Dor d'Verspoetig het de Aaflog of Mexiko Stadt (die Iiheimische saeged ere nor D.F.) i de Nacht stattgfonde. So send mer s'erscht mol of iidroecklechi Art d'Dimensione vo dere 24-Millionestadt zeigt worde. Liecht i alli Rechtige bes an Horizont ond de Flueger esch secher no 10 Minute oeber de Stadt gfloge, bes er glandet esch! In D.F. aacho, esch denne aber d'Immigration absolut riibigslos oeber d'Boehni gange ond guet 1h nach de Landig beni im Hotel gsi. Nach rond 24h onderwaegs beni dete de zemmli kapott id Faedere gheit, ha jo am noechschte Morge weder frueh use muesse.

Am Morge am 8i eschs los gange an Busbahnhof. Au de esch entspraechend gigantisch gsi (oeber 2000 Bus jede Tag) aber au dete hets ohni Problem klappet met mim Internetticket wo ich bereits i de Schwiiz kauft han. Im 1a 1.Klass-Bus eschs denne rechtig Oaxaca losgange. Das es oeber e Stond gange esch, bes mer scho nor us de Stadt dosse gsi esch (ohni Stau!) het d'Dimensione vo dere Stadt nomol iidroecklech uufzeigt. Verbii am schneebedeckte ond rauchende Popocatapetl hani en erschte Iidrock vo Mexiko becho. Nach saechs Stonde abwaechsligsriicher Fahrt beni poenktlech in Oaxaca aacho.

D'Gastfamilie het mi sehr haerzlech emfpange ond mer bi de Aakonft grad mol en rondi Empenadas uufteschet - was well mer meh! Sie wohne imene foer mexikanischi Verhaeltniss sehr schoene, grosse Huus. Mini Gastmuetter, d'Inelva het mi denne au grad of en chliini Sight-Seeing-Tour dor d'Stadt metgnoh ond mer d'Schuel ond alles wechtige zeigt. Mis Zemmer esch sehr schoen ond metem Uuspacke esch langsam s'Gfuehl uufcho, aacho z'sii.