Short Trip Mexico

Nach ere coole ond erholsame Woche in Mexico City hani Bsuech us Europa becho. D'Mel esch mi zom Abschloss no för zwei Woche cho bsueche ond so hämmer e chliine Round Trip met es paar Täg Erholig amene Strand i de Karibik planet. Via Oaxaca, San Cristobal, Palenque ond Agua Azul esches nach Tulum gange. Dank dem ich die Ort alli scho im 2009 bsuecht han, han ich miinere Begleitig en 1a Tour Operator ond Reisefüehrer chönne sii. Tulum esch denne aber au för mech Neuland gsi ond nach de aasträngende Täg onderwäx de perfekti Ort zom Relaxe.

So hämmer die Täg i de Karibik met sönnele, bädele, schnorchle ond was mer söscht no so macht am Strand verbrocht. D'Stränd vo Tulum send wörkli traumhaft, kilometerlang ond wyss, s'Meer esch türkiis. Es bezli Kultur zwösche de Flänzerei het de gliich no müesse sii ond so semmer no d'Mayaruine vo Tulum go aaluege. Die send zwar architektonisch ned so Iidröcklech wie Palenque oder Teotihuacan, aber dank de Lag diräkt anere Klippe am Meer ond met de vielne Palme ghöreds wohl trozdem zo eine vo de schönschte Pyramide vo Mexico ond of jede Fall en Bsuech wärt.

Leider send die Täg am Strand viel z'schnäll vergange ond so hämmer euses Bungalo nach feuf Täg bereits wieder müesse verloh. Metem Flüger esches vo Cancun nach D.F zrögg gange. Vom Flüger hämmer nomol e letschti Uussecht of die schöne Stränd gha ond die weniger schöne Hotelbunker vo Cancun, wo mer bi dem Aableck definitiv froh gsi send, hämmer eus förs ruhigere Tulum entschiede.

Die letschte paar Täg hämmer denne in D.F. verbrocht met bezli Nachtläbe gnüsse ond Shopping ond Verabschiede vo eusne Frönde, bevors zrögg id Schwiiz ond back to real live gange esch. För mech esch das en wonderschöne Abschloss vonere hammer Zyt in Amerika gsi.

So, das wärs mol vorläufig gsi vo dem Abentüür. Ich danke allne förs intressierte verfolge vo mine Erläbnis ond hoffe, dass ich de eint oder ander met es bezli Reisefieber ha chönne aastecke. Hasta luego ond bes bald wieder in Helvetia - Teddiñho

Back in D.F.

Nach dem viele Omereise die letschte paar Woche han ichs gschätzt, bim Roman deheime wieder mol chli fix stationiert zsi. Obwohl mer s'Reise ond d'Neugier no öberhaupt ned abhande cho esch, wird das Läbe usem Rocksack met de Zyt scho chli aasträngend ond me schätzts, wenn mer mol einisch ned jede zweiti Tag wieder muess siini siebe Sache packe ond is nöchschte Ort wiiters zieh.

So hani do in D.F. in alter gwohnter Omgäbig e super Zyt verbrocht, met chli nüt mache, Kollege vo früehner bsueche ond s'Grossstadtläbe chli i mech uufzieh. S'Huus vo de Violeta befendet sech imene ruhige ond sehr sechere Quartier. Vieli vo dene Lüt do wohned scho sit chlii uuf do ond mer kennt sech. Entsprächend send do alli sehr fröndlech ond dos ned grad alltäglech esch, dass metem Roman ond mer grad zwei Gringos dor die Strössli laufed, esch au s'Inträsse a eus entsprächend höch gsi.

Es esch es tolls Erläbnis, dörfe es paar Täg lang am typisch mexikanische Läbe teilzneh. Jede Tag ofem Märt go fröschi Fröcht ond Gmües hole, alles vo de feine Strosseständ probiere ond i de Stadt chli go käfele. Es High Light esch denne au de Märt gsi wo einisch i de Woche i de nöchi stattfendet. Do wird chorzerhand e vierspuurigi Stross gsperrt ond es entstoht en ca. 1km lange riesige Märt wo mer vo Elektronikzuebehör öber Medikamänt bes Goldfisch so zemmli alles meh oder weniger legal chan chaufe.

Sehr spannend esch au de Bsuech vom Unigländ gsi. Mexico City beherrbärgt die gröschti Universität vo Lateinamerika met meh als 40'000 Studänte. So esch das Gländ au meh oder weniger e Stadt i de Stadt met eigene Strosse ond Wohnheim. Es paar Kollege händ grad Graduation, also Abschlossfiir gha, wo in Mexico ziemlech ähnlech wie in Amerika met Chottene ond viereggiger Zottelmötze ablauft, drom semmer dete äne. Das ganze hämmer natürli au gebührend fiire ond so esches de z'Elfte! imene Opel Corsa id Stadt of Tour gange. Typisch mexikanisch halt, esch gar ned so ongmüetlech gsi ond es hätted aso locker no Zwei meh Platz gha ;-)

Guayaquil

Letschti Station foer mech in Equador esch Guayaquil, die met oeber 3 Millione Iiwohner groeschti Stadt ond s'Wertschaftleche Zentrom vom Land. Guayaquil liit am Meer, was mol weder en wiitere Temperaturomschwong vo 10 of fascht 40 Grad bi nahezueh 100% Loftfuechtigkeit foer mech beduetet het. Aber Ochrut vergoht jo schliessli ned so schnaell ;-)

Vo do werd ich denne in es paar Taeg of Medellin ond vo dete wiiters nach Mexiko City zroeggfluege. Imene gmuetleche Hostal met Swimmin Pool han ich mech iiquartiert. In Guayaquil han ich vor gha, mech met de Katty, de Verlobte vomene Techkolleg z'traeffe, wo Equadorianerin esch ond wies de Zuefall het woelle, im Momaent grad ehri Familie do am bsueche esch foer es paar Woche. So semmer a mim erschte Obig z'erscht mol ofenes Welcome-Bierli gange. Eher Papi esch au debii gsi, esch wohl en Art Kontrolle gsi, met was foereme Kaerli siini Tochter sech jetzt wieder omeschloht. Esch aber ganz en sympatische Maa ond ebefalls Ingenieur, so haemmer eus zemmli gli guet verstande ;-)

Met de quasi offizielle Erlaubnis vom Papi het mer d'Katty i de noechschte Taeg "ehri" Stadt zeigt. S'Zentrom vo de Stadt esch voller Gschaeft ond a de Uferzone wo vor es paar Johr froesch oeberarbeitet worde esch ond entspraechend "Malecon 2000" heisst, hets Restauarant ond Kafis zom flaniere. Guayaquil het tourestisch ond kulturell allerdengs ned oebermaessig viel z'biete. Das het mech aber au ned wiiters gstoert, beni doch nach fascht 12 Woche reise au noemme i de Stemmig gsi, zom jedem Museom ond jedem architektonische Meisterwaerch nachezrenne onds z'bestuune...

So hani die Taeg am Morge gmuetlech am Pool ond d'Nomitaeg ond Oebe met de Katty ond ehrne Kollege verbrocht met Kaefele, Kino, Restaurants go aesse, chli i Uusgang go, usw... was mer halt so macht im Grossstadtjungel. Guayaquil ond sini Iiwohner esch mer raecht sympatisch worde i dene Taeg ond so hani en schoene Abschloss in Equador gha.

Mettlerwiile beni nacheme ziemlech aastraengende Flog-Marathon via Kolumbie wieder in Mexiko City aacho, wo ich vo de Violeta ond em Roman haerzlechscht empfange worde be. S'Programm vo de noechschte Woche stoht no ned woerkli fescht, drom weiss ich au nonig so gnau, wenns de noechschti Iitrag do geht :-)

Riobamba und la Nariz del Diabolo

Nach es paar sehr schöne Täg in Baños ond nach glendereter Sehnsocht nachem Bike esches wiiters nach Alausi gange. In Alausi startet de Zog öber die beröchtigit "Nariz del Diabolo" of guet Dütsch Tüüfelsnase. Dor miner gschäftlech bedengte Neigig zo dene Fortbewegismettel han ichs mer natürli ned wölle lo entgoh lo, de einzig no existierendi Zog in Equador au z'fahre :-)

Die Strecki esch früehner en Teil vo de Iisebahnlinie Quito-Guayaquil gsi, het aso die beide gröschte Städt vo Equador metenand verbonde. Nach de Privatisierig vo de Bahn esch aber wie in fascht allne Länder vo Latin-Amerika de ganzi Betrieb bachab gange, wöll d'Betrieber nome no s'Gäld usegnoh händ ond nüt meh in Onderhalt investiert händ. Das einzig no befahrne Stöcki werd denne au uusschliesslech zo tourestische Zwäcke betriebe, esches doch de spektakulärschti Teil vo de ganze Strecki gsi.

Met de alte originale 1.-Klasswäge, zoge vonere Diesellock (alles Meterspur, also wie d'WSB) esches also losgange rechtig Nariz del Diabolo. Esch zwar secher ned ganz vergliichbar met de Berninabahn, aber doch rächt Iidröcklech wie vor öber 100 Johr met ziemli viel Dynamit ond Bluet die Schiene i die änge Schlochte inegmeislet worde send. En ziemlechi Ingenieursleischtig, dörf mer doch gwössi Maximalstiigige ond Korveradie ned öber- bzw. onderschriite.

S'Highlight vo de Strecki send denne die beide Spetzchehrwändene öber d'Nase vom Tüüfel gsi. Muess mer sech so vorstelle, dass de Zog jeweils öber en Weiche ine Sackgass fahrt, d'Weiche omgstellt werd ond de Zog denne henderzi wiiters fahrt. Nach zwei Chehrene esch denne d'Lok wieder vore. Das ganze het de Name Tüüfelsnase becho, wöll de Hoger wo die Spetzchehrine droffe stattfiended met viel Fantasie uusgseht wie es Gsecht met Hörner ond d'Schiene vo de Bahn s'tüüflisch lächelnde Muul darstellt.

Ofem Wäg zrögg ad Küschte id Wärmi hani no en Zwöschestop in Riobamba iigleiht. Riobamba esch es gmüetlechs Industriestädtli wo ned viel touristischs z'biete het. Komischerwiis send das emmer die Orte, wo ich mech am wohlschte füehle ;-) D'Lag vo de Stadt esch aber scho ziemli spektakulär. Am Fuess vom höchschte Bärg vo Equador, em Vulkan Chimborazo (6300m) ond omgeh vo wiitere schneebedeckte 5 ond 6-tuusiger gsehts do chli uus wie i de Schwiiz. Das Tal wo Riobamba drine liit werd au d'Allee vo de Vulkan gnannt, send do innerhalb vo 300km insgesammt 22 Vulkän met ere erstuunleche Gliichmässigkeit je elf links ond rächts verteilt. Au het mer vo do no einisch de Tungurahua vo Baños vo de Röcksiite här gseh qualme. Ganz schöni Kulisse also gsi, das Ganze :-)

Baños

Nacheme gmüetleche Abschlossobe metem Clive händ sech eusi Wäge bereits weder trennt. De Clive het sech wiiters gmacht in Rechtig Peru, ich ha weder chli id Wärmi wölle, in Rechtig Baños.

Baños esch en Ferieort, wo au viel Equadorianer änegönd. Bekannt esch de Ort dank siine heisse Quelle wo dor de Vulkan Tungurahua gspiese werd ond do viel go kuure ond entspanne gönd. De Vulkan het sech au wonderschön presentiert, bi de Busfahrt nach Baños het mer ne iidröcklech öber de Stadt schlummere gseh. Do grad Ostere esch gsi, esch entsprächend viel los gsi do. Am Oschterfriitig esches öblech, dass mer vo Ambato, de nöchscht grössere Stadt die ca. 30km z'Fuess pilgeret, om d'Jongfrau vom heilige Wasser z'ehre. Ich be ehner do änecho zom chli i Wandere ond evtl. ändli mol es Biketürli z'mache.

Am nöchschte Morge hets e bezli grägnet gha ond ich ha mech ergendwie gwonderet, werom soviel Lüt met Atemmaskene omelaufed. Do das aber au gängig esch in Südamerika, wenn mer z.B. erchältet esch, hani mol nüt wiiters dänkt ond en chliini Grippewälle oder so hender dem ganze vermuetet. Au dass alli Auto so komisch met Dräcksprötzer verschlarget send, het mi ned wiiter nachdänklech gstomme.

Am Nomitag han ich mech meter Holländerin vom gliiche Hostal of es chliises Türli zomene Uusechtsponkt öber de Stadt gmacht. Mer händs de ergendwie scho chli komisch gfonde, dass alles so staubig esch. Wo aber denne bi euseres Wanderig s'erschte mol de Vulkan sechtbar gsi esch, esch au eus definitiv 20gi gheit. E riisigi Aschewolke esch sechtbar worde, die esch doch am Tag voräne nonig gsi!

Mer händ de es paar Iiheimischi aakuatscht. Die händ gmeint, das passieri so alli 6 Mönet ond seig ganz normal, im Momänt seig er ruhig. Mer händs aber doch zemmli iidröcklech ond au liecht gförchig gfonde. Näbscht de Äschewolke het de Vulkan vo Zyt zo Zyt au zemmlech luuti Grüsch vor sech geh, muess mer sech vorstelle, wie wenn en Düsejet wörd öber d'Stadt flüge. Of jede Fall en onvergässlechi Erfahrig, mol en aktive Vulkan vo de Nöchi z'gseh.

De Räschte vo de Zyt hani de met es paar Biketürli verbrocht. Eignet sech doch die Gägend do herrvorragend devör, do dank de Landwertschaft fascht of alli Höger ufe gueti Naturstrosse send. S'Material esch zwar ned ganz so guet gsi wie mini Perle deheime, aber zäme met de Höchi het das de Trainingseffekt nor no meh verstärcht, mue jo schliessli Fit sii wenn ich zrögg chome ond mette id Bikesaison iistige ;-)

Latacunga und Quilotoah

Nachdem ich vo de Galapagos weder zrögg im chalte Quito glandet be, han ich mer vorgnoh, no am gliiche Tag wiiters nach Latacunga z'reise. Da het aber bedütet, dass ich z'erscht mol a deses Ändi vor Stadt ha müesse, zom Terminal wo d'Büs rechtig Süde fahret. Binere Stadt wo 50km lang esch, duuret das so siini Zyt ;-)

Has de aber gschafft ond be guet in Latacunga aacho. Im Hostal hani denne min Cousin de Clive, wo in Ängland wohnt, troffe. Ich ha ehm bevor ich of d'Galapagos be, e Nachrecht gschriebe gha, dass ich denne do werde sii. Do de Clive aber metem Duume dor Latinamerika stöpplet, hani ned wörkli gwösst, öb das klappet. Om so grösser esch d'Freud gsi, wo er mer a de Reseption of d'Scholtere klopfet het.

Mer händ de no am gliiche Obig zemmli lang metenand gschwäzt, hämmer eus doch scho sit Johre nömme gseh, s'letschte mol wo mer no Kids gsi send. Scho wetzig, dass mer muess om die halb Wält reise, zom de Cousin weder mol z'träffe :-) Mer händ de ebefalls a dem Obe no entschiede, dass mer zäme es paar Täg wetted go wandere i de Quilotoah-Region.

Nach ere chorze Busfahrt det äne esches de losgange. D'Hauptatraktion im Quilotoah esch de gliichnamigi Krater, of 4100MüM obe meteme See drenenne. Die Gägend esch no sehr indigen prägt ond die Iiheimische behaupted denne au, de See heigi kei Bode - Geologe meine aber so om die 300m tüüf.

Am erschte Tag hämmer de wölle om de ganzi Krater omewandere, ca. 7km / 4-5h. För so zwe Sportskanonene vo Cousins setti das eigentli en Klacks sii. Aber scho noch ca. ere halb Stond het de Clive sech onwohl gfüehlt ond de Verdacht of Höhechranket esch uufcho. 4000m esch jo aber eigentli nüt, so hämmer entschiede, de Hike dorezieh. Im Clive het aber d'Höchi emmer meh zuegsetzt, so hämmer de s'Tempo drosslet ond die ganzi Rondi het sech chli i d'Längi zoge. Im Hostal hets de feins z'Nacht geh ond nach dem aasträngende Tag semmer Zyti is Bett bi Zemmertemperatur om 5 Grad. Do hani doch s'ersche mol min Schlofsack bruucht, hani ne wenigschtens ned ganz vergäbe dor halb Südamerika gschleppt!

Am nöchschte Morge eschs im Clive emmer nonig wörkli besser gange, so het er entschiede, zrögg zgoh of Latacunga. Ich ha aber nochli loscht gha, wiiterzwandere. So esch de Plan gsi, dass ich die erschti Etappe vo de 3-Tägige Wanderig no mache ond de am Obe of Latacunga zrögggange. D'Gägend dete hende esch sehr schön ond gemäss im Reisefüehrer esch de ganz Wäg guet z'fende, wöll beschelderet.

Ich be de met ere Reisende vo Frankriich los, mer händ de aber keis einzigs vo dene Schelder gfonde ond mer händs de mol of guet Glöck probiert. Onderwäx semmer de no ofenes Amerikanischs Pärli gstosse ond die händ eus de verzellt, dass die Iiheimische Indianer die Schelder wieder entfärnt händ, demet si sech als Guides chöned verchaufe. So esch mer de emmer wenn mer öpper nachem Wäg gfrogt händ aagschnauzt worde, d'Uuskonft choschti öppis oder mer sölled doch en Guide neh. Das hämmer de Partout grad äxtra ned gmacht, gönschti wäreds nämmli au ned grad gsi. So semmer de onder böse Bleck vo de Indianer of eigni Fuscht wiitersgange. Eigentli esches au ned so schwer gsi zoms fende, het mer doch grondsätzlech eifacht im Abfall, Fötzeli ond Petfläschene müesse nochelaufe vo de Wanderer voräne. Nacheme schöne 5h Marsch semmer de bim erschte Etappezil aacho.

Die ganzi Gschecht het mi scho chli nachdänklech gstomme. Merkt mer halt weder mol, dass in Equador de Tourismuss scho lang ond relativ gut uusbout esch. Entsprächend werd mer ehner als wandelnde Gäldbütel behandelt als wie als Gast. In Kolumbie han ich mech nie so gfüehlt, aber au in andere Länder wie Mexico oder Kuba ned, dete het mer sech emmer of Bsuecher gfreut. Es chliises Möschterli vo de equadorianische Gastfröndschaft hani de a dem Tag aber uusgrächnet vo dene becho, wonis am wenigschte demet grächnet ha. Vo dem Kaff wo mer nach de Wanderig aacho send, fahret leider ned so viel Büs in rechtig Latacunga zrögg. Wo ich de chli rotlos a de Stross gstande be, het es Polizeifahrzüg aaghalte ond mech gfrogt, wo ich änewöll. Sie händ de zuefällig au i die Rechtig müesse ond so händs mi es Stöck bes zo de nöchschte grössere Stross nach Latacunga metgnoh. Send zwei ächt nätti Type gsi ond mer sendsogar nochli met Blauliecht omegfahre. So het de Tag doch no es chliises Happy End gnoh :-)

Galapagos

D'Galapagos bestönd us 15 grössere ond meh wie hondert chliine Enlse im pazifische Ozean. Es esch en absolut onglaublechi Woche gsi ond definitiv s'High Light vo mim beshärige Tripp! Alli min Erläbnis do z'verzähle wörd grad nomol e Woche bruuche, aber ich probieres mol...

S'Galapagos-Archipel esch en natürlechi Einzigartigkeit wos ned viel vergliibars get. Vor Millione vor Johre send die Enslene ofgrond vo vulkanische Aktivitäte entstande. Dor die grossi Abgschiedeheit vom Feschtland (meh wie 1000km) händ sech so sehr vieli endemischi (Arte wos nor dete get) Tierarte entwecklet. Die Enslene händ sit je her e bewegti Gschecht hender sech. So send si während de Kolonialisierig vo de Pirate als Versteck bruucht worde ond spöter vom bekannte Biolog Charles Darwin för e längeri Zyt ondersuecht worde om siini bekannti ond bes höt wösseschaftlech anerkannti Evolutionstheorie z'grönde.

Am Sonntig em 10.4. esch aso mis Abentür losgange. Metem Flüger beni of Baltra gfloge, em Hauptfloghafe vo dene Enslene. Det semmer vo eusem Guide wo mi bim erschte Aableck an B.A. Baracous vom A-Team erenneret abgholt worde. Metem Bus esches of euses Deheime för die nöchschte 8 Täg gange, em chliine Sägelscheff de "Encatada". Die andere 10 Passagier send bereits an Board gsi, de Vinu en Kolleg us Ängland wo ich in Quito troffe han ond mer zuefällig usegfonde händ, dass mer de gliichi Trip buechet händ ond ich händ somet d'Besatzig komplettiert.

Nacheme feine Mettagässe hämmer Anker ufegholt ond send gstartet i eusi Enselchrüzfahrt. Of de ganze Tour hämmer insgesammt 11 Enslene bsuecht wo mer die verschiednigi Flora ond Fauna bewonderet händ. Jedi Ensle het sech dorch ehri grossi Abgschiedeheit andersch entwecklet ond esch so i ehrem Erschiinigsbeld einzigartig ond schön gsi. Euse Guide esch sehr loschtig ond onderhaltsam gsi. Mer alli händ siini grossi Liideschaft zo dene Ensle ond Natur wo er noch öber 30 Johr no emmer gha het bewonderet. Entsprächend met viel Elan het er eus das Paradies nöcherbrocht.

Jede Tag semmr mendischtens zweu Stonde am schnorchle gsi ond händ so au die vielfältigi Onderwasserwält kenneglehrt. Wasserschildchrötte, Mantas, Sting Rays, diversi Hai-Arte bes zom Hammerhai, Nemos ond tuusigi wiiteri vo farbige chliine Tropefesch, Koralle hämmer us nöchscher Nöchi chönne bewondere. Am Morge ond am Obe hämmer jewiils wonderschöni Sonneonder- ond Uufgäng chöne bewondere ond z'Nacht de Stärnehemmel bire frösche Seebrise vom Fahrtwend

An Bord semmer vo de Chochkönscht vom Augustin verwöhnt worde. Meischtens esch nachem z'Nacht de Anker gliechtet worde ond mer send ofere mehrstöndige Fahrt zo de nöchste Ensle tuckerlet (ab ond zue au gsäglet). Mer het gmerkt, dass mer im Pazifik esch, ab ond zue hets de Kahn doch zemmli doregschöttlet ond im einte oder andere en flaue Mage verpasst. Mim Chuehmage het d'See zom glöck nüt chönne aaha, Uuchrut vergoht ebe ned ;-)

Of eine vo de Ensle esch d'Charles Darwin Station gsi, s'Hauptquartier vo de Wösseschaftler. Sie versueched met aller Chraft, das Paradies z'erhalte ond vor frömde Iiflöss z'schötze. Es esch sehr wechtig, dass keini ander Pflanze oder Tier of die Ensle chömed ond das heikle Gliichgwecht störed. So wärded Rattene wo vor honderte vo Johre vo de Pirate iigfüehrt worde send ond d'Eier vo de Leguane ässed, aber kein natürleche Feind händ do bekämpft, gnauso wie weldi Huuschatzene wo vo Mönsche bi de Besiedlig im letscht Johrhondert iigfüehrt worde send, wo nochem Schlöpfe die jonge Wasserschildchrötte jaged, bevor die is Wasser chönned glange, usw... I dere Station esch au de "Lonesome George" e 80 jöhrigi Rieseschieldchrötte ond de letschti vo siinere Art. Mer haltet ne do met zweu Wiibli vonere "kompatible" andere Rieseschildchrötteart ond probiert so, die Art wieder uufz'zöchte, behär allerdings ohni Erfolg. Meh erfolg het mer metere andere Art gha, wos vor guet 30 Johr nor no eis Mändli ond ca. 8 Wiibli geh het. De Borscht het aber alles geh ond mettlerwiile meh wie 2500 Schildchrötte s'Läbe gschänkt, riifi Leischtig vo dem Kärli!

D'Zyt esch wie Flog vergange ond mer esch chum nochecho, die Erläbnis z'verarbeite. Leider eschs Ändi viel z'schnäll cho, hätt locker no e Woche meh chönne ometuckerle zwösche dene schöne Enslene. D'Abrondig vo dere ganze Tour send de super Guide, d'Crew wo en absolut familiäri Atmosphäre of dem Scheff gschaffet het ond die sympatische Mettoureschte gsi. Met ehne hani au en wonderschöne Geburtstag im wortwörtleche Paradies dörfe verbrenge.

Ich be bestemmt ned s'letschte mol of de Galapagos gsi ond cha en Uusflog dete äne nor jedem wärmschtens empfähle, wo mol dete i de Gägend setti sii. Die onglaublechi Schönheit ond Zerbrächlechkeit vo dem Paradies, wo eim au nachdänklech öber de Omgang vo de Mönschheit met de Natur macht, dörfe z'Erläbe esch es onvergässlechs Erläbnis.